Hemserekê Yewîya Îrtîbatê Azadî (YRA) Dilyar Cizîrîyî derheqê hêrişanê dewleta tirke yê vera rojnamegeran de ANFyî rê qisey kerd.

Cizîrîyî îfade kerd ke rojnamegerê herême plan û bernameyanê gemarinan ê dewleta tirke ya îşxalkere deşîfre kenê coka yenê hedefkerdene û vat: ''Rojnmegeranê herême têkilîya dewleta tirke ya bi DAÎŞî deşîfre kerdbî. Rojawanê Kurdîstanî de 27 rojnamegerî ma şehîd dayî. Dewleta tirke çapemenîya azade seba xo sey astengêke vînena û kena ke aye tasfîye bikera.''

Cizîrîyî vist vîrî ke Gulîstane Taraya ke hêrişê dewleta tirke de Silêmanî de şehîd bîya Rojawan de xebitîyabî û vat: ''A tim peyê raştîye de bîye. A Rojawan de zî sey Başûrî seba resnayîşê raştîyan xeylêk kede daye. La netîceya hemkarîya PDK-dewleta tirke de şehîd bîye.''

Dilyar Cizîrîyî da zanayene ke hêrişê vera rojnamegeran sûcê şerî yê û vat: ''La dewleta tirke verê çimanê pêro dinya de rojnamegeran qetil kena. Wextê hêrişê vera JIN TVyî de ma dezgehanê mîyanneteweyîyan rê muracat kerdbi la nînan vera dewleta tirke çîyêk zî nêkerd.''

Dilyar Cizîrîyî ard ziwan ke domanê şarê kurdî mîrasê serkêşanê Têgêrayîşê Azadîye yê Kurdan de şinê û vat: ''Hêriş û tedayî bi rojnamegeran do nêeşkê. Rojnamegerê ke plananê gemarinan ê dewleta tirke deşîfre kenê çew nêeşkeno nînan vindarno. Têkoşînê çapemenîya azade do vera dewleta tirke ya îşxalkere dewam bikero.''