Komunê Enternasyonalîstî yê Kobanê naye ra ver kerdîbî eşkera ke tarîxanê 27 û 28’ê Çele de do her hetê dinyaye de çalakîyî bêrê viraştene. Komunî beyanatê xo de vatbi azadbîyayîşê Kobanê yê 27’ê  Çele yê 2015’î hêvî daya pêroyê dinyaye û ganî Şoreşê Rojawanî tena nêro veradayene.

Beyanatî ra dima, tewr tay 20 welatan de, 2 rojî çalakîyî ameyî organîzekerdene. Aktîvîstan, her hetê dinyaye de bi çalakîyanê xo waşt ke welatê ke çekan danê rejîmê Tirkan bêrê deşîfrekerdene û cuya înan a rojaneye asteng bikerê.

Sydney ra heta Moskow, Helsînkî ra  heta New York, Munîh ra heta Londra tewr tay 55 bajaran de, sazîyê ke rejîmê Tirkan de hemkarîye kenê ameyî deşîfrekerdene. Derheqê şoreşê Rojawanî de fîlmê sînema ameyî musnayene û semînerî ameyî dayene. Tayê bajaran de kesê namdarî beşdarê çalakîyan bîyî.

Çalakîyanê Aktîvîstan ra tayê xo wina yê:

Bajarê DYA New York de rojnamegera femînîst a namdare Glorîa Steîneme beşdarê çalakîye bîye û paştdarîye daye şoreşê Rojawanî.

Bajarê Swîsre Basel de Credît Suîsse yo ke paştdarîya fînansî dano dewleta Tirkan ame protestokerdene û verê banê Credît Suîsse de pankarto ke ser o “Şoreşê Rojawanî bipawê“ nusayebi ame dardekerdene.

Xeylî bajaranê Swêdî de zî şîrketê SAAB’î yo ke wesayîtanê leşkerîyan dano Tirkîya ame protestokerdene û verê fabrîkayanê şîrketî de çalakîyî ameyî kerdene.

Paytextê Îngilîstanî Londra de şîrketê BAE’yî yo ke hetê leşkerî, ewlehî û pawitişî de hemkarîya Tirkîya keno ame protestokerdene.

Paytextê Fînlanda Helsînkî de zî afîşê derheqê şoreşê Rojawanî bananê hukmatî ra ameyî dardekerdene.

2 rojan de bi seyan çalakîyî ameyî organîzekerdene û organîzatoran ra Ulrike Martînî vat hetê hîsîyatî ra Rojawanî de paştdarîye êdî bîya globale. Martînî va çalakîyî bi hewayêkê serkewteyî derbaz bîyê û bi nê çalakîyan înan bale anta şîrketanê Rojawanî yê ke bi hemkarîya qilêrine dewleta Tirkîya de tekîlîyê xo estê ser.

Martinî va şîrketê Rojawanî Tirkîya, Surîye û Iraq de şerî teşwîq kenê û wina dewam kerd:“ Leşkerîya Tirkîya tanqan Almanya, wesayîtanê leşkerîyan Swêd ra, helîkopteran zî Îtalya ra gêna. Nê şîrketê ke pêro hacet û wesayîtan roşenê Tirkîya, hetê sucî ra zî şirîgê rejîmê Tirkan ê.