Fermandara Eyaletê Hecinî ya YPJyî  Axîne Qamişlo hêrişê vera Dêrazorî yê ke 7ê temmuze de hetê hukmatê Şamî û grûbanê Difa El Watanî ra ameyî destpêkerdene, nêrazîbîyayîşê şarî yê vera nê hêrişan û bitaybetî eleqaya cinîyan ê Dêrazorî ya seba YPJyî ANFyî rê erjnayî.

Axîne Qamişlo ard ziwan ke hêrişê vera Dêrazorî seba ke herême de têmîyankewtiş bivejîyo û bawerîya şarî ya seba QSDyî bêro şiktene ameyî destpêkerdene û vat: ''2014î ra heta nika vera Dêrazorî zaf hêrişî ameyî kerdene. Vera heme hêrişan QSD cewab dano û derban dano dîmenî ro. Xora verê hêrişî derheqê ci de eşkerayîye amebî dayene. Înan hem zere de hem zî teber de xo hazir kerd bi. La nê hêrişan zaf derg nêkerd çunke hêzanê ma cewabê ci da. Hêzanê Şamî warî sîvîlî hedef girewtî. Bitaybetî bajarê Dehla zaf ama hedefgirewtene. Vera Ebû Hemamî bi çekanê giranan hêrişî ameyî kerdene. Tîya zî warê sîvîlî ameyî hedefgirewtene. Hêrişan de şaro sîvîl şehîd bi, birîndar bû keyeyan zirar dî la rixmê nê şarî pêser game nêeşte. Çunke şar hinî dişmenî hol sarisneno.''

Axîne Qamişlo îfade kerd ke çeteyê ke operasyon de ameyî tepiştene îtîraf kerd ke hukmatê Şamî û dewleta tirke paştî dayo înan û qiseykerdişê xo rê wina dewam kerd: ''Hêrişî têna hetê çeteyan ra nêameyî kerdene. Peyê nê hêrişan de tay dewletê herême bibî. Dewleta tirke û bitaybetî hukmatê Şamî peyê hêrişan de ca geno. Tîya bitaybetî hesabê dewleta tirke est ê. Wazena herême de têmîyankewtiş biafirno û bawerîya şarî ya seba QSDyî bişikno. La hema hesabê înan betal bîyî. Şarê Dêrazorî paştî daye QSDyî. Tay waran de şar bi xo çeke girewt û paştî cayê  şerwanan de vindet. Sîvîlan mewzîyan de nobete tepişt. Çend rojî yo propaganda kenê vanê Ebu Hemam bîyo veng. La ma nika Ebû Hemam de yê şar cuyeya xo ya normale ciwîyeno. Heta şaro sîvîlo ke banê ci bîyî hedefê hêrişî yeno QSDyî ra hetkarî wazeno. QSD paştî dano şarî û rêçanê hêrişî pak keno.

Grûbêke est a ke xo sey hêzanê eşîran dana pênaskerdene la ne şar ne zî eşîrê herême na grûbe qebul kenê. Şar wazeno na grûbe tîya ra vejo. Kesê ke na grûbe de hetê hukmatê şamî û çeteyan ra bi pere ameyî tepiştene.  Hêrişî dahîna zaf hetê Ebû Hemam û Qiranîçî de ameyî kerdene. Çunke tîya hucreyê rakewtişî yê çeteyan estbî. Coka tîya ra dest pêkerd la ser nêkewtî. Hêzanê ma tay operasyonî kerdî. Nê operasyonan de xeylêk hucreyê rakewteyî ameyî tepiştene. Xora hucreyê ke ameyî tepiştene înan zaf çî îtîraf kerdî, vat dewleta tirke û hukmatê Şamî ê  rêxistin kerdî û paştîdayîşê cephane û lojîstîkî dayo ci.''

Axîne Qamişlo ard ziwan ke cinîyê Dêrazorî zaf eleqa mojnenê YPJyî û nê vatî: ''Cinîyî YPJyî semedê xo sey hêvî vînenî û wazenê mîyanê YPJyî de têkoşîn bikerê. Herême de seba ke hem awanîya komelkî ya feodale est a hem zî çend serrî verî DAÎŞî tîya zîhnîyetê xo vila kerd, cinîyan ser zaf zext est o. Cinîyan tîya zaf tengayî ante, erzîyayî teberê cuye. Cinî tim gamêke peynî de bî. Bado ke herême DAÎŞî ra ameye pakkerdene cinîyan tîya gamê pîlî eştî. Rêxsitinî û dezgehê înan ê xoser est ê.  Yewîya cinîyan a Zenobiya est a. Cinîyî dormeyê na yewîye de xo rêxistin kenê û cehd kenê ke her warê cuya de bibê. Seba ke YPJ herême de yo no bitaybetî paştî dano cinîyan. YPJyî ra zaf heskenê û ci rê hurmet kenê.  Cinîyî vanê  'YPJ mifte yo ke verê ma akeno' û yenê tewrê YPJyî benê. Cinîyê ke raştê hêrişê camêrdan yenê cade yenê YPJyî ra vanê. Cinîyî wazenê hem xo hem zî komelî bibedilnê. Coka wazenê nê bi rayîrê YPJyî bikerê.

Sey hêzanê YPJ û QSDyî ma do tim paştî bidê şarê Dêrazorî û cayê înan de bê.  Ma do înan vera heme hêrişan bipawê. Bitaybetî semedê cinîyan ê Dêrazorî çîyo ke destê ma ra yeno ma do bikerê. Ma hazirê ke  her qeyde têkoşîn  û fedayîtîye bikerê ke cinîyan ê Dêrazorî tengayî ra bixelisnê. Ma sey YPJyî vera zîhnîyetê tarî yê DAÎŞî şer kerd, ma hema vera nê zîhnîyetî şer kenê.  Heta ke heme cinîyî nê zîhnîyet û zordarîye ra bêrê xelisnayene ma do têkoşîn bikerê.''