Hêzanê hukmatê Şamî û grûbanê çekdaran ê Difa el Wetanî 7 tebaxe de vera Dêrazorî hêrişo hîra dabi destpêkerdene. Nê hêrişan de bitaybetî warê sîvîlan ameybî hedefgirewene û 14 sîvîlan dinyaya xo bedilnabî. Hetê QSD û hêzanê Meclîsê Leşkerî yê Dêrazorî ra cevabê hêrişan amebi dayene û hêrişî peyser ameybî qeldayene.

Endamê Meclîsê Leşkerî yê Dêrazorî Hogir Cizîrî derheqê hêrişan de ANFyî rê qisey kerd. Cizîrî vat: ''Hêzanê QSDyî derbayê gidî dayî hêrişkaran ro. Nê hêrişan de di embazê ma zî şehîd bîyî. Hêrişê hukmatê Şamî yê bi çekanê giranan vera herêmanê sîvîlan dewam kenê. Xeylêk sîvîlan dinyaya xo bedilnaye. Embazanê ma semedê qesasî hîrê çalakîyî kerdî. Nê çalakîyan de zî derbeyê girdî dîyayî piro. Xora naye ra dima şikyayî.

Nê hêrişî têna hetê nê çeteyan ra nêbenê. Peyê nê hêrişan de tay hêzê herême est ê. Sey dewleta tirke tay dewletî peyê nê hêrişan de yê. Mesajê ma xora zelal o. Ganî şarê ma zî vera nê kayan hîşyar bo. Ma do destur medê waştişê nê çeteyan ke bi pere ameyî ernayene û nê hêzan bêrê ca. Şarê Sûrîye 12 serrî yo raştê qirkerdişanê girdan yeno. Ma raştê hêrişanê zaf girdan ameyî. Nê hêrişan ra menfeatê hêzanê herême û grûbanê çeteyan est o. Coka semedê şarê Sûrîye çareserîya sîyasîye hewce kena.

Hêrişê vera Dêrazorî newe nîye. Verî zî hêrişê winayên ameyî kerdene. Hetê hukmatê Şamî, nê grûban û dewleta tirke ra kayê leyminî yenê kaykerdene. Wazanê têmîyankewtiş vejî. Tewirê eşîranê Dêrazorî vera hêrişan zelal o. No plan têna vera Dêrazorî nîyo, vera heme herême yo.  Xora eşkerayîyanê xo de zî vanê. Vanê do Dêrazorî ra heta Qamişloyî şirê. Gama ke hêrişê vera Dêrazorî benê bi hewayêkê hemwextî xeta Minbic û Til Temirî de zî hêrişî dest pê kenê. Her metodî şuxilnenê ke waştişê xo bîyarî ca. La hêzanê ma cewabê gird da înan. Xora şarê ma zî tim paştî dano hêzanê xo. Paştê şarî QSDyî ra pêt a. Çunke şar zano  hêzanê QSDyî ke o wext ê DAÎŞî ra xelisnayî ewro zî do înan pêro hêrişan ra bixelisno.''