Operasyonê Bahozê Cizîre yê 2019î de bi hezaran keyeyê DAÎŞî Kampa Holî de ameyî cakerdene. Serra 2019î ra nata hucreyê DAÎŞî Kampa Holê de tehlukeyêko cidî yo. Kampe de 28ê adara 2021î û 25ê tebaxa 2022yî de di operasyonî ameyî kerdene. Wextê peyênî de bi destekê QSD û YPJyî Kampa Holî de safhaya hîrêyîne ya Operasyonê Merdimatîye û Asayîşî dîyaye destpêkerdene. 

Hemsereka Kampa Holî Cîhane Henan derheqê operasyonî de ANFyî rê qisey kerd.

Cîhane Henan vist vîrî ke Operasyonê Merdimatîye û Asayîşî bi destekê YPJ, QSD û Hêzanê Asayîşê Zereyî yeno kerdene. Cîhane vat: ''Hêzê Koalîsyonê Mîyanneteweyî zî do paştî bidê operasyonî. 2022 de ma safhaya diyîne kerdbî. O çax zî kampe de serebûtê sey kiştişî zêdîyabî la operasyonî ra dima rewşe bîye hol. Nika aseno ke DAÎŞî xo newe ra rêxistin kerdo. Kampe de serebûtê dizdî, îşkenceyê vera cinîyan ûsn zêdîyenê. Coka ma hewce dî ke safhaya hîrêyîne bidê destpêkerdene. Hetê bînî ra ma rê agahîyî ameyî ke DAÎŞ planê hêrişê vera kampe keno.''

Cîhane Henan pare kerd ke paştdayîşê teberî ra nêbo DAÎŞ nêeşkayêne xo hende wextê kilmî de rêxistin bikero û vat: ''Aseno ke teberî ra destek dîyeno cerganê Holî. Her sereştiş de çek û cebilxaneyî yenê dîyene. Hetê bînî ra hêrişanê dewleta tirke ya îşxalkere ra dima DAÎŞî rêxistinîya xo xurtêr kerda. Bi taybetî wextê peyênî de çew nêeşkayêne debikewo kampe. Hende serebûtî tede zêdîyayî. Hêrişê dewleta tirke zerarê pîlî danê kampe. Her ke dewleta tirke hêriş kena, kampe de DAÎŞ xo rêxistin keno. Hêrişê dewleta tirke hem aramîya herême xeripnenê, hem zî hêz danê hucreyanê DAÎŞî.''