Hêzanê Asayîşê Zereyî Rojawanî da zanayene ke netîceya hêrişê dewleta tirke yê vera Qamişloyî de teqayîşêk ame meydan û  4 kesan dinayaya xo bedilnaye.

Eşkerayîye de nê ameyî vatene: ''Goreyê zanayîşanê ke hêzanê ma netîceya cipersayîşî fînayî dest, ewro saete 16. 12 de taxa Sinaa ya Qamişloyî de nizdê benzînxaneyê Hiskoyî de wesayîtêk raştê hêrişê droneyê çekdarî yê dewleta tirke ame. Netîceya hêrişî de 4  hemwelatîyî şehîd bîyî 2 kesî birîndar bîyî. Rewşa birîndaran giran a. Warê hêrişî de cayanê karî de zî ziraro madî ame meydan. Xebatê tesbîtkerdişê nasnameyanê şehîdan dewam kenê. Ma reyna vanê ke sebebê nê hêrişanê dewleta tirke bêvenîya mîyannteweyîye ya.''