Her çiqas hêrişê dewleta tirke yê vera Rojawanî dewam kenê zî xebatê perwerdeyî zî Rojawan de bêmabên dewam kenê. Termînê perwerdeyî yê 2019-2020î de ke binê îşxalê dewleta tirke de dewam kerd bernameyê perwerdeyî yê bi merkezê ziwan û kulturî bi hawayêkê serkewteyî ame caardene.

Şaristanê Dirbêsîyê yê Kantonê Hesekê zî bi giranî bi hedefê hêrişanê dewleta tirke. Şaristan de şarê kurdî, erebî û sûryanî pîya ciwîyenê û dibistanan de perwerde zî bi zaf ziwanan yeno dayene. Dirbêsîyê de 125 dibistanî û 8 hezar wendekarî estê.

Wendekarê ke bi ziwanê kurdkî perwerde vînenê hûmara înan 3 hezar û 800 ya. Hûmara wendekaranê ke bi ziwanê erebkî perwerde vînenê 369 a. Asta lîseyî de zî 416 wendekarî bi ziwanê kurdkî û 72 wendekarî zî bi ziwanê erebkî perwerde vînenê. Dirbêsîyê de 1050 mamostayî estê.

Mamostayan hamnan de perwerdeyê formasyonî qedîna. Rojawan de rewşa wendekaran goreyê îmtîhananê ke peynîya serre de yenê kerdene, yena ercnayene. 

Endama Îdareyê Dibistanan ê Dirbêsîyê Ezîza Emîn vat: ''Perwerde seba averşîyayîşê şarêkî girîng o. Dewleta tirke rast a rast dibistanî hedef girewtî. Naye ra Dirbêsîyê de dibistanan wexêk mabênê perwerdeyî da. Coka ma wextê termînê yewînî derg kerd.''