Çeteyanê DAÎŞî taxa Xiwêranî yê Hesekê de pê bombayan hêrişê zîndanê ke çeteyê înan tede de yê kerd. Hêzanê asayîşî cewabê hêrişî da û destûr nêda çeteyî biresê armancê xo. 

Badê hêrişî dormeyê zîndanî de sixletîya têgêrayîşê leşkerî ameye dîyene. Teyarayê Koalîsyonê Mîyanneteweyî de serê zîndanî ra firdayî. Zîndano ke qala ci yena kerdene de 5 hezar çeteyê DAÎŞî estê. 

Hêzanê Sûrîyeya Demokratîke (QSD) derheqê babete eşkerayîye daye û nê pare kerdî: ''Zîndanê Xiwêranî yê Hesekê de terorîstanê DAÎŞî newe ra têmîyankewtiş vet ke biremê. Hêzanê ma mudaxale kerd û cedhkerdişê înan betal vet. Naye ser o çeteyan tankerê ke aîdê şîrketê Sadkopî yê teqnayî. Hêzanê ma cewabê înan da û pêkewtişî qewimîyayî. Derheqê serebûtî de zanayîşê hîra do peyra bêrê vilakerdene.''

Dima ke çeteyê hêriş de ser nêkewtî Hîrgoşê Basilî de tankerî madeyê vêşnayîşî teqnayî. Çeteyê ke zîndan de yê înan zî çî-mî vêşna.Goreyê zanayîşanê verênan pêkewtişan de  hêzanê asayîşî ra di kesî birîndar bîyî. QSDyî da zanayenê ke zîndan de rewşe binê kontrolî de ya.

Dîya zanayene ke teyarayanê Koalîsyonê Mîyanneteweyî çeteyanê ke hêrişê zîndanî kerdê cayê înan tesbît kerd û da piro la hûmara çeteyanê ke ameyî kiştene nêame musayene.