Hemserekê PYD’yî Şahoz Heseno ke ANHA rê qisey kerd bale ante tehdîtan û sewqîyatê sinorî yê dewleta Tirkî yê  vera Vakur û Rojakeweta Sûrîye ser û vat vera hêrişê îşxalkarî do xoverdayîşê înan gird bo.

Hesenî vist vîrî ke dimayo ke QSD’yî çeteyanê DAÎŞ’î rê da vînîkerdene dewleta Tirkî seba ke hûzûr  asayîşê herême birijno çi ke dest ra yeno kena û nê vatî: ‘’ Tekîlîya dewleta Tirkî û DAÎŞ’î xora hetê her kesî ra yena zaneyene. Tewr peynî de îşxalê Efrînî de zî no çete ame şuxulnayene. Dewleta Tirkî roja verêne ya krîzê Sûrîye ra wazena ke Sûrîye îşxal bikero. Nika zî wazenê ke cayê ke destê çeteyan ra gerîyayî, bîyî azad reyna dest bifînê. Dewleta Tirkî vera Kurdan polîtîkaya qirkerdişî dana domnayene.  Çîyê ke bi destê DAÎŞ û El Nûsra nêeşkayê bikero ewro wazena bi xo bikero. Sîyasetê dewleta Tirkî leymin û bitehluke yo. Vakur û Rojakewtena Sûrîye ra qet guleyêk Tirîya ser ra nêbîyo la heme hêrişê ke ma rê bîyî, sinorê Tirkîya ra bîyî. No semedê herême tehluke yo û ganî bêro vindarnayene. Hêzê mîyannteweyîyî ganî tehdîtanê Tirkîya yê vera Sûrîye vînê û destûr înan nêdê.’’

Hesenî wina dewam kerd: ‘’Tirkî ya wazena ke bi kerrayêk di milçîkan bikişo. Sûrîye perçe bikero û vera Kurdan qirkerdişê xo rê dewam bikero. Çeteyanê xo keyeyanê Kurdan ca kenê û wazenê ke heme Kurdan tîya ra vejî. Ma dîyalog esas gênê la eke dewleta Tirkî hêrişê ma  bikero ma do xoverdayîşêkê xurtî bidê pêramotene. Bêşik o ke dewleta Tirkî wazena ke hêrişê Vakur û Rojakewtena Sûrîye biko. Eke wina yew waştişê înan çînebîn, înan hende esker, sîleho giran û çeteyî sinor de ca nêkerdene. Ganî her kes bizano ke hêrişo winayên tena zirar herême nêdano, Tirkîya zî do ci ra barê xo bîgêro. Reyna do polîtîkaya Amerîka û Rûsya rê zî tesîr bikero. Weçînitişo peyên de Tirkîya Erdogan ra vat ke ma na poltîka qebûl nêkenê. Bi zîhnîyetê faşîstî hêrişkerdişê Vakur û Rojakewtena Sûrîye qet problemêk çareser nêbeno. Heqê Erdogan û hukmatê ci  çîno ke şer vejê.’’