Vervatoxê QSDyî Ebcer Dawûdî vat: ‘’Ma do îdeolojîya DAÎŞî werte ra wedarnê.’’ Endama Hêzanê Asayîşê Zereyî yê Cinîyan Bahare Abbas zî vat: ‘’Erkê ma yo ke bi ferasetêkê azadî û demokratîkî komelêkî awan bikerê.’’
Kampa Holî û dormeyê ci de operasyonê asayîşî hetê Hêzanê Asayîşê Zereyî, Hêzanê Asayîşê Zereyî yê Cinîyan, YPG û YPJyî ra vera çeteyanê DAÎŞî dîyabi destpêkerdene.
Vervatoxê QSDyî Ebcer Dawûdî û Endama Hêzanê Asayîşê Zereyî yê Cinîyan Bahare Abbas ANFyî rê qisey kerd.
Ebcer Dawûdî pare kerd ke DAÎŞ gêreno ke krîzê Sûrîye ra ancî xo gandar bikero û vat: ‘’DAÎŞ hema zî herême de tehluke yo. Armancê operasyonî asayîşê herême yo. Operasyon bi serkewtişî û bi destekê Îdareyê Xoserî derbaz beno. Kampe de sivîlan ser o hêrişî est ê. Ma kenê ke asayîşê sivîlan bîyarê ca û xîretanê DAÎŞî çin bikerê.’’
Bahare Abbas ard ziwan ke DAÎŞ ferasetê xo mîyanê cinî û domanan de vila keno û armancê operasyonî têkoşînê vera nê ferasetî yo. Bahare vat: ‘’Ma wazenê ke cinî û domanê ke kampe de manenê wa asayî binê. Erkê ma yo ke bi ferasetêkê azadî û demokratîkî komelêkî awan bikerê. Tehlukeyê DAÎŞî hema zî dewam keno.
No operason seba pawitişê Îdareyê Xoserî yo, seba awankerdişê komelê demokratîkî yo. Wa şarê ma bi Hêzanê Asayîşê Zereyî bawer bibê. Ma do tim seba şarê xo têkoşîn bikerê. Serkewtiş do tim ê ma bibo.’’
