Heyva Sor a Kurdistanî da zanayene ke, seba se hezaran Efrînijan ê ke herêma Şehba de ciwîyenê  rê 300 hezar euro, betanî, 5 ambûlansî, cilî, derman, xida, seba tutan şit dayo şawitene.

Îzehetî de nê ameyî vatene: “Dewleta Tirkî û çeteyanê aye 20ê Çile ya 2018î de hêrişê sivîlan ê ke Efrîne de yê kerd. Bi bombakerdişê wareyanê sivîlan asayîşê gan û malê sivîlan mîyan ra ame wedarnayene. Keye, ban, camî, nêweşxane, awbend û kampê bextwaştoxan hetê dewleta Tirkî ra ameyî bombakerdene. Heme mal û milkê Efrînijan ame diznayene û talankerdene. Zereyê 2 mengan de, tutî, cinî û kokimî zî tede bi 500 kesê sivîlî ameyî qetilkerdene û  zafêrê 1000 kesî zî birîndar bîyî.”

DEWLETA TIRKÎ HERINDA EFRÎNIJAN DE ÇETEYÎ BICA KERDÎ

Heyva Sor a Kurdistanî vist vîrî ke rîyê hêrîşan ra bi hezaran hemwelatîyanê Efrînî mucbur cayê xo caverda û koç kerd û wina va: “Dewlata Tirkî, bi se hezaran Efrînijî cayê ci ra vetî û herinda înan de çeteyî bica kerdî. Bi vurnayîşê demografîyî,  Efrîn yeno talankerdene.’’

Heyva Sor a Kurdistanî destpêkerdişê hêrişanê dewleta Tirkî û çeteyanê aye ra heta nika seba şarê Efrînî bi heme îmkananê xo bîye hetkare û nêzdîyê mîlyonêk 500 hezar hetkarîya madî şawite.

Heyva Sor a Kurdistanî veng da  Kurdistanijan û heme dostanê înan û waşt ke wa paştî bidê şarê Efrînî.