Hêzanê Asayîşê Zereyî yê Cinîyan Kampa Rojî ya Dêrikî de vera DAÎŞî operasyonê asayîşî yo hîra da destpêkerdene.

Fermandarîya Hêzanê Asayîşê Zereyî yê Cinîyan derheqê operasyonî de eşkerayîyêke daye çapemenîye. Fermandaran ra Bêrîye Omer eşkerayîye wende.

Eşkerayîye de dîya zanayene ke çeteyê DAÎŞî alozîyanê herême ra firsend vînenê û xo newe ra rêxistin kenê. Eşkerayîye de bale ameye antene xîretanê hêrişî yê DAÎŞî ser û ame vatene ke Kampa Rojî de gefê çeteyan dewam keno.

Fermandare vat: ‘’Vera nê gefan hêzanê ma bire daye ke nê operasyonî bikerê û aramîya kampe û herême bîyarê ca. Ma bi destekê YPJyî operasyonî kenê. Armancê ma kampe de cigêrayîş, teqîbkerdiş û tepiştişê çeteyan o. Na hemle qerardarîya ma ya seba qedînayîşê DAÎŞî eşkera kena. Ma do heta peynî têkoşînê xo yê vera çeteyan rê dewam bikerê û şarê xo bipawê.’’