Hêzê Asayîşê Zereyî bi nameyê Natora ke şarê asûran ra serra 2011î de awan bîyî û tewrê xoverdayîşê vera cerganê DAÎŞî yê Dêra Zorê, Reqa, Tebqa û Minbicî bîyî nika zî asayîşê qezaya Til Temirî ya Hesekê ra berpirsîyar ê ke qeza de hedefê hêrişanê dewleta tirke de yê.  Natora îfade kerd ke ê do vera hêrişê dewleta tirke ya îşxalkere û cerganê aye erdê xo bipawê û do cewabê hêrişan bidê.

Nînûs Xelîl Werda yo ke 5 serran ra nata Natora de yo vat ke: "Cergê ke ma verê cû vera nînan şer kerd nika dewleta tirke reyde hêrişê herême kenê. Seba ke ma nê erdî cerganê DAÎŞî ra bixelisnê zaf şehîdî dayî. Se beno wa bibo xoverdayîşê ma do dewam bikero. Hêrişê dewleta tirke û cerganê aye do bêcewab nêmanê. Dewleta tirke vana 'Ma herême do terorîstan ra pakî bika.' la cergê OSO bi xo terorîst ê. Ma do heta peynî erdê xo vera îşxalkeran bipawê."

Endama Natora Henane Xuşaba vat: "Bi vatişê 'terorîstî' merdimê herême qetil kenê. Hêzê mîyanneteweyî hemkarîya îşxalê dewleta tirke kenê. Dewleta tirke 2 mengan ra zêdêr o ha erdê ma îşxal kena, hêrişê ma kena la vera naye hêzanê mîyanneteweyî bêveng ê û tewirêk nêmojnenê. Vera îşxalkeranê ke herême de qirkerdiş kenê ma do heta peynî xo ver bidê û erdê xo îşxalkeran ra bipawê."