Hêzanê Xalisnayîşê Efrînî bi beyanatêkî pare kerd ke çalakîyanê qesasî de Şera û Mera de tewr tay 2 leşkerî û 2 cergî ameyî kiştene.

Beyanatê HRE wina yo:

"Hêzanê ma çarçewa çalakîyanê xo yê qesasî de vera artêşa tirke ya îşxalkere û cerganê aye herêma Efrînî û Mare de çalakîyî kerdî.

Tarîxê 28ê teşrîna peyêne de hêzanê ma dewa Malîkîye ya qezaya Şare de vera qerargehêkê artêşa tirke ya îşxalkere çalakîye ameye kerdene. Netîce de 2 leşkerê artêşa tirke ameyî kiştene. 28ê teşrîna peyêne de hêzanê ma şaristanê Efrînî de taxa Eşrefîye de vera cerganê koma Firqat El-Hemze çalakîyêka sabotajî kerde. Netîce de wesayîtêkê leşkerî ame îmhakerdene. Heman çalakîye de cergê bi nameyê Rabî Ebû Arîf ame kiştene û cergêk zî birîndar bi. Heman tarîxî de hêzanê ma dormeyê şaristanê Mare de vera cerganê artêşa tirke ya îşxalkere çalakîyêka sekbanî kerde. Netîce de cergêk amekiştene. Artêşa tirke ya îşxalkere û cerganê aye dewanê Malikîye, Merenaz, Şewarixa yê qezaya Şera û dewanê Aqîbe, Bêne yê qezaya Şêrawa ser o bi obusan bombayî varnayî."