HRE: 8 îşxalkerî ameyî kiştene, 2 wesayetî ameyî îmhakerdene

Hêzanê Xelisnayîşê Efrînî (HRE) pare kerd ke çalakîyanê înan ê vera hêzanê tirkan ê îşxalkeran yewê ci leşker 8 cergî ameyî kiştene û 2 wesayîtî zî ameyî îmhakerdene.

Hêzanê Xelisnayîşê Efrînî (HRE) eşkerayîyêka nuştekîye weşanaye û da zanayene ke 4 û 5ê nîsane de hêzanê înan tay çalakîyî kerdî.

Eşkerayîya HRE wina ya:

''Roja 4ê nîsane hêzanê ma dewa Meryemîne ya qezaya Şera de vera baregehêkê artêşa tirke ya îşxalkere çalakîyêka sekbanîye kerde. Netîceya çalakîye de leşkerêk ame kiştene. Hêzanê ma dewa Dêrsiwan û dewa Çema ya qezaya Şera de vera cerganê artêşa îşxalkere 2 çalakîyê sabotajî kerdî. Netîceya nê di çalakîyan de 2 wesayîtî ameyî îmhakerdene, 6 cergî ameyî kiştene.

Roja 5ê nîsane hêzanê ma dewa Malikîyê ya qezaya Şera de vera cerganê artêşa îşxalkere çalakîyêka sekbanîye kerde. Netîceya na çalakîye de cergêk ame kiştene. Hêzanê ma dewa Kefer Xaşirî ya herêma Ezazê  de vera çeperêkê cergan ê îşxalkeran çalakîyêke kerde. Netîceya na çalakîye de hûmara kişte û birîndaran nêameye zelalkerdene.

Temamîya çalakîyanê hêzanê ma de 7 cergî û leşkerêk ameyî kiştene, 2 wesayîtî zî ameyî îmhakerdene.''