Hêzanê Xelisnayîşê Efrînî (HRE) bi eşkerayîyêka nuştekîye da zanayene ke Şehba de tewr tay 22 îşxalkerî ameyî kiştene û 3 şerwanê înan şehîd bîyî.

Eşkerayîye de nê ameyî vatene: ''1ê sibate de artêşa tirke û grûbanê çeteyan ê Sultan Murda, Cebhe El şamiyê û Ehrar El Şamî yê ke pabesteyê ci yê bi çekanê giranan herêmanê dewa Til Rihalî û Qilê Radarî de hêriş kerd. Hêzanê ma cawab da îşxalkeran û hêrişê înan pûç vet. Netîceya pêkewtişan de tewr tay 22 çeteyî ameyî kiştene û bi desan zî birîndar bîyî.

Pêkewtişan de hemrayê ma yê qehremanî Dilpak Efrîn, Nemir Efrîn û Bakûr Efrîn ê ke bi qerardarîye semedê pawitişê erdê xo şîyêne dişmenê îşxalkerî ser şehîd bîyî. Ma do vera îşxalkeran têkoşînê  xo gird bikerê û waştişê şehîdanê xo bîyarê ca.''