Rêxistina Çimdarî ya Heqanê Merdiman (HRW) pare kerd ke herêmanê ke Dewleta Tirke bi behaneyê ''herêma biasayîşe'' îşxal kerdî de înfazê komî û xaspî yenê kerdene û nê herêmî seba sivîlan bitehlûke yê.
HRWyî derheqê herêmanê ke Dewleta Tirke îşxal kerdî de beyanat da û vat nê herêmî seba sivîlan bitehlûke yê.
Dîrektora Rojhelatê Mîyanênî ya HRWyî Sarahe Leah Whitson vat: "Înfazî, talanî û astengkerdişê agêrayîşê roniştoxan îsbat kenê ke çira herêmê biasayîşî yê Tirkîya bitehlûke yê. Herêman de cergê Dewleta Tirke heqanê sivîlan binpay kenê û cîyakerdişê etnîkî kenê."
Beyanatê HRWyî d enê çîyî ameyî parekerdene: "Tirkîya û fraksîyonanê ci cayanê sivîlan de roja destpêkê hêrişan ra nat tewr tay înfazî kerdî, bombayî varnayî, keye û mulkê taybetî yê sivîlan xesp kerdî û derheqê xebatkaranê weşîye yê ke herêmanê binê kontrolê înan ra ameyî remnayene de beyanatêk nêkerd.
HRWyî venga selahîyetdaran û berpirsîyaranê hêrişan da ke hesab bidê û qetî bikê ke şaro ke wazeno abigêro semedê nasname û etnîkê xo nêro astengkerdene.
Beyanatî de ame vatene: "Hukmatê Tirkîya hînî hetkarîya Artêşa Mîlî ya Sûrîye nêkero."
Whîtsene vat: "Tirkîya têgêrayîşanê fraksîyonanê xo peygoş kena. Heta ke Tirkîya tîya kontrol bika mecbur a ke berpirsîyarîya peygoşîye biba û nînan ser o cigêrayîş bika."
