Artêşa Tirkan û cerganê aye saetanê serê sibayî ra bi teyarayanê keşfî yê bêmerdiman û bi çekanê giranan Til Temir û Zîrgan de  vera hêzanê rejîmî dest pê hêrişan kerd.

Verî ke Temsîlkaro Taybet ê Sûrîye yê DYA James Jeffrey Anqara de selahîyetdaranê Tirkan û cergan reyde pêvînayîş biko, Artêşa Tirkan û cerganê aye serê sibayî dest pê hêrişanê giranan kerd.Hêrişan de bi SÎHAyan dewa Şeîfa,  Gubur Fercanê, Dirdara, Um El Kêf, Kasimîye, Rihanîye, Menax û Mehmûdîye de tewr tay 4 leşkerê payeberzî yê rejîmî merdî. Hêrişê vera dewa Um Şeîfa de di leşkerê payeberzî yê rejîmê Sûrîye birîndar bîyî. Birîndarî ameyî berdene bi nêweşxaneyê Şehîd Lêgerînî. Hêrişê verba dewa Qubûr Fercane de 4 leşkerê rejîmî merdî. Dewa Um El Kêf de û dewa Dildara de zî 6 leşkerê rejîmî birîndar bîyî. Dewa Dildara de wesayîtêkê katyûşa yê rejîmî hetê SÎHAyan ra ame îmhakerdene. Dewa Um Şeîfa de muxabirê televîzyonê dewlete yê Sûrîye El Îhbarîye Fadil Hemad zî birîndar bi. Dewa Dildara de zî hêrişan de wezîfedarê weşîye Aram Ehmed (22) birîndar bi.Herêma Um Şeîfa, Gubur Fercanê, Dirdara, Um El Dêfî, Kasîye, Rihanîye, Menax û Mehmudîye de hêrişê giranî yenê kerdene, sivîlî neçare manenê ke keyeyê xo ra şorê.Hêrişê ke bi tankan, topan, hawanan û obusan amebî destpêkerdene, dewam kenê. Herêma de tevgêrayîşê ÎHA û SÎHAyan zî dewam kenê.