Fermandarîya Pêroyî ya Hêzanê Asayîşê Zereyî da zanayene ke Hemleya Merdimî û Asayîşî ya ke 25ê tebaxe de Kampa Holî de vera hucreyanê DAÎŞî dîyaye destpêkerdene, qedîyaye.

Fermandarê QSD, YPG û YPJ zî tewrê eşkerayîya çapemenîye bîyî. Eşkerayîye de ame vatene ke Merheleya diyên a Hemleya Merdimî û Asayîşî ya Kampa Holî qedîyaye la ê do tim vera tehlukeyî vejîyê. Reyna bale ameye antene tekîlîya dewleta tirke û DAÎŞî ser û ame vatene hucereyê DAÎŞî waranê Sûrîye yê ke bine îşxalê dewleta tirke de yê tîya paştîdayîş û perspektîf genê. Fermandarîya Pêroyî veng da hêzanê mîyanneteweyîyî ke wa vera tehluleyê DAÎŞî berpirsîyarîya xo bîyarê ca.

Eşkerayîye de nê ameyî vatene:  ‘’Hemleya ma ya ke vera hucreyanê DAÎŞî 25ê tebaxe de ameye destpêkerdene, 24 rojî kerde derg. Hucreyê terosîtan kampe de şarî rê îşkence û cînayetan kenê. Nê hucreyî cezaya îdamî danê û teror û tewr kampe de vila kenê. Têna emser kampe 44 kesî ameyî qetilkerdene. DAÎŞ keno ka kampe bigêro binê kontrolî.

Vera nê hêzanê ma kampe de operasyon da destpêkerdene. Hêzanê ma xeylêk xeymê ke semedê vilakerdişê terorê DAÎŞî yene şuxulnayene wedaritî û berpirsîyarê înan tepişti. Hesekê û Hol de hîrê cinîyî ameyî tepiştene. Xeylêk çekî ameyî destfînayene û tunel û hedekî yê ke çeteyî tede çekanê xo niminenê ameyî vînayene. Hîrê çimeyê ke tira çekî yenê peydakerdene zî ameyî tesbîtkerdene. Di cinîyê êzidîyî ameyî xelisnayene. Nê çar serran de 200yî ra zafêr cinîyî hetê YPJyî ra ameyî xelisnayene. Reyna çar cinîyê ke hetê cinîyan ê DAÎŞijan ra pê rezilan ameybî giredayene ê zî xelisnayî.

Ganî komelê mîyanneteweyîyî gamanê xurtan bierzo. Heme dewlete ke hemwelatîyê înan kampe de yê ma venga înan danê ke wayîrê hemwelatîyanê xo vejîyê û perbirsîyarîya xo bîyarî ca. Ganî tekîlîya dewleta tirke û DAÎŞî bêro vînayene û şiro Tikrîya ser ke wa verê nê terorî bêro girewtene.

Hamle de 36ê înan cinîyî 226 çeteyî ameyî tepiştene û 25 tunel û hendekî ameyî tespîtkerdene. Reyna xeylêk çeke, malzemeyê resnameyîşî û aletê îşkenceyî ameyî destfînayene.”