Dewleta tirke ya îşxalkere 14ê çeleyî de hêrişê îstasyonê ceyranî yê Kobanê kerd û ê çaxî ra nata Kobanê û dormeyê ci de ceyran çin o. Hêrişanê dewleta tirke ra Eyn Îsa û dormeyê ci zî bê ceyran mendî.

Hemsereka Ofîsê Enerjî yê Kantonê Firatî Eyşe Nasir derheqê tesîrê hêrişanê dewleta tirke ya îşxalkere de ANFyî rê qisey kerd. 

Eyşe Nasir vîst vîrî ke dewleta tirke ya îşxalkere çeleyî ra nata ancî bi giranî hêrişê Rojawanî kena û raşta raşte binawanîya herême kena hedef. Eyşe vat: ''Dewleta tirke Kantonê Firatî de bînayanê xizmetî kena hedef. Netîceya hêrişanê ci de Îstasyonê Ceyranî yê Eyn Îsayî xizmetî ra vejîya. Nika 300 dew û Eyn Îsa bê ceyran mendî. Çend saetan ra dima dewleta tirke hêrişê regulatorî kerd ke xizmet dayêne şaristan û dewanê Kobanê. Kobanê û 360 dewî 14ê çeleyî ra nata bê ceyran ê. Kobanê û Eyn Îsa de bi temamî 660 dewî bê ceyran mendî.''

Ayşe Nasir îfade kerd ke dewleta tirke wazena bi hêrişanê xo qesasê DAÎŞî bigêra û DAÎŞî herême de aktîf bikera. Ayşe Nasir ard ziwan ke hêrişê dewleta tirke yê vera waranê sivîlan û bînayanê xizmetî barbarîya ci nîşan kenê.

Ayşe Nasir bale ante ser ke dewleta tirke bi eşkerayîyan hertim Îsraîlî rexne kena ke çira hêrişê nêweşxane û sivîlan keno la dewleta tirke zî Kobanê de nêweşxane hedef kerdo. Ayşe Nasir vat: ''Netîceya hêrişê dewleta tirke de Nêweşxaneyê Miştenûrî yê Kobanê nika nêeşkeno xizmet bikero. Dewleta tirke qaşo vana ke çîyê ke Îsraîl Filîstîn de keno, vera merdimatîye yê. La gelo çîyê ke dewleta tirke kena do se bibê?

16 rojî yo Kobanê bê ceyran a. Hêrişê dewleta tirke yê vera herême hê dewam kenê. Heta ke regulatorî virazîyê, ma kenê ke bi motoran ceyran bidê her taxa Kobanê. Ma kenê ke binê bombardumanan de zî xizmetê şarê xo bikerê.''