Dewleta tirke netîceya îxanetê PDKyî de 2yê teşrîna verêne ya 1992yî de Xakurkê de hêrişê gerîlayan kerdbi. Dima şer vilayê Heftanîn û Zapî bibi. Kawa Dêrik o çax refanê gerîlayan de tewrê şerî bibi. Dêrikî ANFyî rê qalê şerî kerd.

Dêrikî pare kerd ke ê şerê 1992yî sey şerê îxanetî pênase kenê û vat: ''Şer de PDKyî ma rê îxanet kerd. Kongreya 1990î de têgêrayîşê eyaletanê Botan û Behdînanî ameybî îlankerdene. Gerîlayan 90-91 de derbê pîlî dabî artêşa tirke ro. O çax destekê partîyanê Başûrî ra nêbîyêne dewleta tirke rew ra bin kewtêne. O çax Rayber Apoyî seba PDKyî vatbi 'PDK seba ke Amerîka, Îsraîl û dewleta tirke ey qebul bikerê, tewrê planê tasfîyekerdişê PKKyî bi.' 

1992 de ez Xakurkê de bîya. War de qasê 600 gerîlayî est bîyî. O çax ma texmîn nêkerdêne ke PDK vera ma tewrê şerî beno. Coka ma tedbîrê hewceyî zî nêgirewtbî. Xora mabênê fermandarîya ma ya eyaletî û PDKyî de pêvînayîşî ameybî kerdene. PDKyî vatbi ke eke gerîlayî xo nêancê ê do hêrişê ma bikerê. La ma ancî zî PDKyî ra hêrişêk nêpawitêne. Ma teyna vera dewleta tirke plansazîya çalakîyan kerdêne. 2yê teşrîna verêne ya 1992yî de nişka ra PDK tewrê çeperan bi. Dewleta tirke nêeşkayêne bi asanî debikewa Xakurkê, tim hewayî ra hêrişî kerdêne. Teyna PDK û YNK ney xeylêk partîyê sîyasîyî yê Başûrî tewrê şerê 1992yî bîyî. 

Heman wextê hêrişê PDKyî de dewleta tirke zî ancî hewayî ra dest pê hêrişan kerd. Dewleta tirke bêmabên warê ma dayêne bombayan ver. Îranî sînor ma rê qefilna, xora PDK û YNKyî pêro sînorî ma rê qefilnabî, Vakur de dewleta tirke ma rê operasyonî kerdêne. Serra 92yî serrêka zehmete bîye. Hem îxanet hem zî ablûqa est bîyî. PDKyî raşta raşte hêrişê gerîlayan kerdêne. Ma PDK 92 de hol şinasna. Mengêke wina şerî dewam kerd. Netîceya nê şerê îxanetî seba her kesî giran bîye. Nê şerî de qehremanê ma şehîd bîyî. La gerîlayan vera îxanetî qetî apey gamêke zî nêeşte. 

PDK nika zî hetê dewleta tirke de hêrişê gerîlayan keno. Heyf ke PDKyî îxanet xo rê kerdo edet. PDK verê gerîlayan de dafikan nano ro. Ez venga PDKyî dana ke wa îxanetî ra fek vera bido.''