Kîtê testê vîrusê Korona yo ke Rojawan de virazîya û netîceyê ci se ra 85 serkewte yê, nêweşxaneyanê Rojawanî de seba weşkerdişê pawitiş-vergirewtişî yeno xebitnayene.

Kîtê testî yo ke hetê Komîteya Weşîye ya Rojawanî ra virazîya û mabênê 30-35 hêlan de netîceya ci eşkera beno, dima ke ÎSOyî ra sertîfîka girewt pêşkêşê Rêxistina Weşîye ya Dinya (WHO) ame kerdene.

Ame parekerdene ke kîtê testî pêşkêşê dezgehanê weşîye û tay welatan ame kerdene û nînan waşt ke patenta kîtan bigêrê labelê Komîteya Weşîye ya Rojawanî qebul nêkerd.

Doktoranê Nêweşxaneyê Nêweşîyanê Qelbî û Sêneyî yê Qamişloyî ra Înan Xelîlî qala nê kîtê testî kerde.

Xelîlî îfade kerd ke înan kîtî erşawitî Çîn zî û uca de 3 nêweşxaneyanê pîlan de ameyî cerbinayene. Xelîlî eşkera kerd ke kît se ra 85 bi netîceyanê serkewteyan dano.

Xelîlî vat: ''Armanco bingeyî yê testî teşhîso lez o. Nêweşan ra mîsalê kulxî gêrîyeno, kîtî ser o 3 beşî estê. Beşo verên û o hîrêyîn seba îltîhabanê normalan o. Vurnayîşê rengî yê beşê diyînî zî mojneno ke nê kesî pê vîrusî kewtî yan nê.''

Înan Xelîlî da zanayene ke kît mabênê 30 û 35 hêlan de netîce mojneno ra. Xelîlî vat: ''Teşhîskerdişo lez û rew her hetî ra zaf girîng o. Bi nê hawayî hem nêweşîye dormeyî ra vila nêbena û hem zî nêweşan rê cade mudaxele yeno kerdene. ''