Hemverê hêriş û tehdîtê îşxalî yê dewleta Tirkî de, Federasyonê Vakur û Rojakewtena Sûrîye de reaksîyonî benê zêde.

Çalakîya mertalê ganeyî ya ke bendanê sînorî de amîya destpêkerdene dewam kena, hetêna ra zî Reqa, Dêrazor, Tebqa, Minbic, Girê Sipî û Kobanê ra bi hezaran kesî ver bi bargehê Koalîsyono Mîyanneteweyî yê Kantonê Kobanê şîyî. No barge dewa başûrê kantonî Xirbe Eşkî de yo. Hemserekê Meclîsê Rayberdişî yê Îdareyê Xoserî yê Vakur û Rojakewtena Sûrîye Ebdilhamid Mihbaş û Bêrîvan Xalide zî tede, xeylî selahîyetdar û rayberî tewrê rayraşîyayîşî bîyî. Rayraşîyayîş de beyraqê QSD, YPG-YPj’yî û posterê şehîdan ameyî kiriştene û pankartê ke sloganê hemverê dewleta Tirkî tede estbî ameyî kiriştene.

Hetkarê hemserekê Meclîsê Rayberdişî yê Firatî Mihemed Şahîno ke qiseykerdişêk kerd vat, “Ma nêameyî tîya ke çewî ra rica bikerê. Ewro Ewropa, Asya û welatê bînî saya ma de mîyanê asayîşî de yê. Hendî wext ameyo ke hêzê mîyanneteweyîyî bikewê dewre û mesuldarîyanê xo bica bîyaro. Nê şarî bi hezaran ewladê xo mucadeleyê hemverê terorî de dayî. Ma wazenê bêro zanayene ke ma bîyê temsîlkarê waştişê Rojakewtena Mîyanêne ya bêşerî.”

Berîvan Xalide zî ard ziwan ke dewleta Tirkî Sûrîye û Lîbya de paştî dana terorî û sebebê şerê xomîyanênî yê Sûrîye zî Tirkîya ya.

 Serekê Partîya Ameyoxê Sûrîye Îbrahîm el Qeftanî vat ganî tewirê hukmatê Sûrîye yê hemverê dewleta Tirkî net bo û Mutabaqatê Edeneyî bêro xovîrrakerdene. Qeftanî veng da Hêzê Koalîsyonî, vat ke seba viraştişê aşitî ganî sere de “dewletê terorîstî” bêrê binfînayene û mesuldarîya ke kewena înan milî ser bica bîyarê. Qeftanî vat raver de çi peymana ke bibo de ganî zordayîşê teslîmîyetî çinbo, goreyê awankerdişê aşitîye bica bêrê. Dimayê qiseykerdişan ra çalakî bi eştişê slogananê hemverê Tirkîya qedîyaye.