Kobanê de şehîdê 25’ê Hezîrane ameyî vîrardene
Çeteyanê DAÎŞ’î 25’ê Hezîran a 2015’î de Kobanê de hêrişê sivîlan kerd û xeylî sivîlî qetil kerdî. Bi wesîleya serrgêra qetlîamî şehîdê Kobanê serê goranê xo de ameyî vîrardene.
Kobanê de şehîdê qetlîamê DAÎŞ’î yê 25’ê Hezîran a 2015’î ameyî vîrardene.
Vîrardişê ke Şehîdgehê Şehîd Dîcle yê Kobanê, şehîdgehê dewa Berxbotanî û Şehîdgehê Qetlîamê 25’ê Hezîrane yê merkezê Bajarî de ameyî viraştene îdarekaranê Kobanê û Firatî ya pîya bi hezaran kesî tewrê înan bîyî. Dimayê qiseykerdişê bi nameyê Meclîsê Keyeyanê Şehîdan serê heme goranê şehîdan de mûmî ameyî tafînayene.
15’ê Hezîran a 2015’î de Girê Spî ame azadkerdene. 10 rojî dimayê azadkerdişê Girê Spî çeteyanê DAÎŞ’î 25’ê Hezîran a 2015’î de hêrişê Kobanê kerd. Qetlîamê çeteyan de cinî û domanî zî tede 253 sivîlî ameyî qetilkerdene.
