Hetkarê Hemserekê Meclîsê Rayberdişî yê Îdareyê Xoserî yê Rojawanî Hesen Koçerî derheqê hêrişanê îşxalî û gefanê dewleta tirke yê vera Rojawanî de ANFyî rê qisey kerd. 

Koçerî da zanayene ke dewleta tirke destpêkî ra nata hêrişê Şorişê Rojawanî kena û vat: ''Dewleta tirke verî hêrişê xo sey şerê sîyasî û taybetî, dima pê paştdayîşê bi DAÎŞî, komanê Îslamî û OSOyî dewam kerd. Wexto ke nê ser nêkewtî dewleta tirke bi xo hêriş kerd. Dewleta tirke wazena pêro şaran qir bikera xora Qirkerdişê Zaxoyî zî îsbatê ney o.  Dewleta tirke qasê 30 kîlometreyan de asayîşê xo bîyarê ca. Wextêk DAÎŞ tîya de bi o çax seba Tirkîya meseleya asayîşî çin bîye. Dewleta tirke wazena bi hîkayeyanê sey asayîşê sînorî qirkerdişî bikera. Nika a bi xebatanê xo yê dîplomatîkan wazena Efrîn, Serêkanîyê û Girê Sipî de se kerdo reyna bikera. No têna seba kurdan nê seba pêro dinya tehluke yo.''

Koçerî bale ante Qirkerdişê Zaxoyî ser û vat: ''Dewleta tirke wazena têna kurdan ser o ney ereban ser o zî serwerîya xo awan bikera. Nika Iraq de 66 baregehê dewleta tirke est ê û wazenê heman çîyî zî Sûrîye de bikerê. Ganî Qirkerdişê Zaxoyî hol bêro famkerdene. Eke nê qirkerdişî de kurdî bimerdêne çewî vengê xo do nêkerdêne. Reyna dewletê mîyanneteweyî Sûrîye de kerdişanê Tirkîya rê vengê xo nêkenê.  Ez vana qey dewleta tirke nika ra xeylêk dewletan ra destûrê hêrişî girewto. Qaşo nê dewletî demokrat ê la benê hemparê qirkerdişanê dewleta tirke. Erdogan domanan qetil keno. Tirkîya bîya dewleta terorî. Tirkîya DAÎŞî ra zî hîna zaf tehlukeyîn o. Dewleta tirke nê çîyan verê çimanê dinya de kena. Çew dewleta tirke rê vengê xo nêkeno la ma do xo ver bidê û xoverdayîşê xo hîna geş bikerê. Wa çew ma rê nêvajê xo mepawê. Ma mecbur ê ke xo bipawê.''

Koçerî vist vîrî ke Fermandara Yewinanê Antî Terorî (YAT) Jîyane Tolhildan hêrişê dewleta tirke de şehîd bibîye û vat: ''Embaze Jîyane Koalîsyonê Mîyanneteweyî reyde vera DAÎŞî şer kerdbi. Koalîsyon hema nêeşkeno embazanê xo yê wezîfe bipawo senî do şarê ma bipawo? Dewleta tirke kesanê ke vera DAÎŞî şer kerdêne kena hedef. Dewleta tirke cinîya sereberze, azade û wayîrrûmete qebul nêkena.  Dewleta tirke şexsê embaze Jîyane de pêro cinîyî kerdî hedef.''

Koçerî da zanayene ke herême ser o gêrayîşê teyarayan serbest o û vat: ''Ez venga Amerîka û Rûsya dana ke eke şima nêeşkenê komelî bipawê bi zelalî şarî rê vajê. Rûsya û Amerîka destûr danê teyarayanê Tirkîya ke serê herême de bigêrê. Înan seba îşxalê Serêkanîyê, Efrîn û Girê Sipî destûr dayo. Ê cesaret danê dewleta tirke. Dewleta tirke xora kiştişê kurdan ra zewq kena. Kurdî hînî ci rê bîyê fobî. Dewletê Ewropa vanê 'Ma demokrat ê' la dewleta tirke rê vengê xo nêkenê. Dewleta tirke bi nameyê 'têkoşînê vera terorî' xizmetê terorî kena. Wina nêbeno. Ganî her dewlete hînî tewirê xo bi zelalî bimojna. Pê xapîyanîyîşî no çi nêbeno.''

Koçerî îfade kerd ke ê paştî xo nêdanê qet yew dewleta xerîbe û vat: ''Ma têna hêzê xo şarê xo ra gênê. Merdim ganî mevajo kombîyayîşê Tehranî ra do çîyêk nêvejîyo. Zanîyeno ke kombîyayîşê Astana yeno manaya parçekerdişê erdê Sûrîye. 

Nika Îdareyê Xoserî Rewşa Îstîsnayîye îlan kerde. Ma zanenê ke verê ma de şerêko pîl est o. No şerê ma do nêmano şeranê bînan. Ganî komelê ma tedbîranê xo bigêro û mekanîzmaya xo ya pawitişî awan bikero. Tek şansê ma xoverdayîş o. Ma do bi xoverdayîşî serfîrazîye bivisnê destî. Ma do herêmanê îşxalkerdeyan zî bixelisnê. Koyan de gerîlayanê azadîye dewleta tirke teng kerda. Dewleta tirke seba ke uca de ser nêkewta wazena hêrişê ma bikera. Tek hedefê ma pîlkerdişê şorişî yo. Roje bi roje şorişê ma do pîl bibo.''