Hetkarê Hemserekîya Meclîsê Rayberdişî Hesen Koçerî derheqê hêrişanê hêzanê Şamî û cerganê ci yê vera Dêra Zorê û hêrişanê dewleta tirke de ANFyî rê qisey kerd.

Hesen Koçerî îfade kerd ke Rejîmê Şamî bi hêrişanê Dêra Zorê armanc kena ke aramîya herême herimno û şerê mabênê kurdan-ereban vejo. Koçerî vat: '' Hêrişê rejîmî benê sebeb ke merdimî bimirê. Xora QSD cewabê ê hêrişan dano. Şarê ma zî tim paştî dano şarê Dera Zorê. Nê hêrişê rejîmê Şamî xizmetê dewleta tirke kenê. 

Dewleta tirke nika gêrena ke Iraq û Sûrîye de îtîfaqan viraza, destkewteyanê şarê ma tasfîye bikera û Îdareyê Xoserî çin bikera. Dewleta tirke wazena ke dewleta Osmanîyan apey biaçarna. Ganî vera ney tewirê xurtî bêrê girewtene. Ganî şarê kurdî bizano ke qiseyê dewleta tirke 'kurdan de meseleya ma çin a' zûr a. 

Wina aseno ke hêrişê vera Dêra Zorê do vilayê herêmanê bînan zî bibê. Şarê ma, bi taybetî şarê ma yo ereb vera nê  hêrişanê rejîmê Şamî tim nêrazîbîyayîşê xo mojneno. Sey Îdareyê Xoserî ma tim kenê ke destkewteyanê şarê xo bipawê. Ma do îtîfaqê şarê kurdî û erebî xurtêr bikerê. Pawitişê ma yê vera hêrişanê dewleta tirke û rejîmê Şamî meşrû yo. Ma hêrişê nînan nêkenê û nînan de şer nêkenê. La ma xora do şarê xo bipawê. Ma tim wazenê ke meseleyî bi dîyalogan çareser bibê. Hukmatê Şamî de şerê ma çin o. Eke hêrişî biqewimîyê ma do hîna xurt cewab bidê.''