Rojawanê Kurdîstanî de weçînayîşê herêmîyî 30ê gulane de yê. Hetkara Hemvervatoxanê Yewîya Şaredarîyanê Kantonê Cizîre Bêrîvane Omer ANFyî rê qalê îdareyanê şaredarîyan ê Rojawanî kerd.

Bêrîvane Omer da zanayene ke Şorişê Rojawanî ra dima Qamişlo de 7 şaredarîyî ronîyayê û dima herêmanê bînan zî şaredarîyê xo ronayê. Bêrîvane vat: ''Hêverî 2013 de karê rêxistinkerdişî yê seba weçînayîşan ameyî plankerdene. 2015 de Rojawan de weçînayîşê herêmîyî yê verênî ameyî kerdene. 2017 de goreyê weçînayîşanê meclîs û komunan hemşaredarî ameyî weçînayene. La seba ke no sîstem bîyayêne sebebê ereykewtiş û alozîyan kantonan de komîteyê şaredarîyan ameyî awankerdene.''

Bêrîvane Omer pare kerd ke xizmetanê esasan reyde şaredarîyanê binê îdareyê şarî de komelêkê rêxistinkerdeyî reyde şaredarîtîya raşte do mumkîn biba û vat: ''7ê nîsane de Qanûnê Şaredarîyanê Demokratîkan û Yewîya Şaredarîyan ê Îdareyê Xoserî ame qebulkerdene. Bi nê qanûnî ma do derbazê sîstemê neweyî bibê. Serra 2023yî ra nata ma seba ronayîşê nê sîstemî amadekarîye kerdêne. Bi tesdîqê şarî ma do derbazê nê sîstemî bibê. No qanûn merkezîperwerîye ra dûrî yo, îradeyê şarî esas keno û 63 madeyan ra yeno pê. Nê 63 madeyan de erk û mesuldarîyê îdarekerdişê şaredarîyan yenê rêzkerdene. Ma do sîstemê Yewîya Şaredarîyan a Rojawanî awan bikerê. Hinî dew û bajarekî pabesteyê şaredarîyanê şaristanan nêbê. Yanî sîstem do sade bibo.''

Bêrîvane îfade kerd ke proses de tay meseleyî qewimîyenê la ê do heqê nînan ra bêrê. Bêrîvane vat: ''Nê xebatanê ma reyde şer zî dewam keno. Şertanê şerî ra projeyê ma yê viraştişê rayîran, awe û xeyranî nêameyî cakerdene. La şarê ma tim hetê ma de bi. Şarê ma zaneno ke şaredarîyê ma mîyanê bêîmkanîye de zî eşkenê xo newe ra awan bikerê.''