Hemsereka Kongreya Îslamî ya Demokratîke Delale Xelîl derheqê pratîkanê kongre yê Rojawanê Kurdîstanî de ANFyî rê qisey kerd.

Delale Xelîl bale ante ser ke DAÎŞî xo medreseyan de rêxistin kerdo û dima Îslamo radîkal ferzê şarî kerdo. Delale vat: ''Seba ke tesîrê DAÎŞî berê şiknayene ma xo rê fikrê 'Îslamê Demokratîkî' yê Rayber Apoyî kerd esas.  Ma hêverî 2014 de Yewîya Dînan awan kerde. 2021 de ma kongreya diyîne ya Kongreya Îslamî ya Demokratîke kerde. Her çî ra girîngêr ma mîyanê Kongreya Îslamî ya Demokratîke de meclîsê cinîyan awan kerdî. Yanî ma vera nêweşîyanê komelkîyan têkoşîn kenê. Ma kenê ke kongreya ma bi rolê afernayîşê komelê polîtîk û exlaqîyî têbigêra.

Heyf ke ewro dînî seba menfeatan sey hacetî şuxilîyenê. Komîteya ma ya Fetwa fikranê Kongreya Îslamî, Quran, sunetê pêxemberan kena esas. Yanî ma fetwayêka newîya nêdanê. Kongreya Îslamî ya Demokratîke Peymana Medîne xo rê kena esas. Çunke Peymana Medîne yewîye, têdûştîye û wayûbiratîya şaran kena esas. Hetê bînî ra Komîteya Perwerdeyan a Kongreya Îslamî dibistanan ra heta Zanîngehê Rojava dersan dana.''

Delale Xelîl da zanayene ke mîyanê dînan de tewr zaf cinîyî zehmetîye ancenê û vat: ''Babeta ke ma tewr zaf tira zehmet vînenê na ya ke cinîyî bêpers  her çî sey qederî qebul kenê. Bi Kongreya Îslamî ya Demokratîke ma wazenê nê ferasetî biqedînê. Seba dînêkê raştikênî ganî ma hêverî cinîyan rêxistin bikerê. Vera îqtîdarî, dewlete, hegemonya, zulm û şerî ganî ma dînêkî biafernê. No dîn zî dînê Pêxemberî bi xo yo.''