Vervatoxa Komîteya Perwerdeyî ya Kongreya Starî Gulîstane Gulo derheqê karanê Komîteya Perwerdeyî ya Kongreya Starî de ANFyî rê qisey kerd.

Gulîstane îfade kerd ke ronîyayîşî ra nata Kongreya Starî girîngîyêka pîle dana perwerde û rêxistinkerdişî. Gulîstane vat: ''Mîyanê komelî de meseleya cinîyan meseleya bingeyîn a. Coka Kongreya Starî xo bingeyê şorişê ferasetî de awan kena. Kongreya Starî kena ke cinîyî bi fikr, îdeolojî û ferasetêkê neweyî xo awan bikerê, bibê wayîrê rol û îradeyan. Perwerde heqêko bingeyîn o. Ma bi komun, meclîs, akademî û kooperatîfan karê perwerdeyî anê ca. 

Ma her ca de semîneran kenê, her şaristan de akademîyan akenê. Perwerdeyê ma qasê 20-25 rojan dewam kenê. Ma nê perwerdeyan ra tim netîceyanê xurtan gênê. 2023 de zî ma Akademîyê Branşan akerdî. Akademîyanê ma û dersanê ma de hem bi kurdkî hem zî bi erebkî perwerde dîyeno. Yanî ma hêverî komunan akenê dima zî, komunê şaristanan akademîyan danê û nînan ra pey zî akademîyê branşan dest pêkenê. Akademîya branşan zî qasê mengêke yan zî hîrê mengan dewam kena.''

Gulîstane da zanayene ke înan bi wesîleya 8ê Adare Roja Cinîyan kampanyayêka newîya daya destpêkerdene û çarçewa na kampanya de her cayî ra gêrenê qala 8ê Adare kenê. 

Gulîstane vat: ''Ma wazenê kadroyanê xo yê perwerdekaran hîra bikerê. Hetê bînî ra ma perwerde danê camêrdan zî. Seke Rayber Apoyî vatbi 'Cinîyî teyna xo ney ganî camêrdan zî perwerde bikerê.' Perwerdeyê ma zî bi hawayêkê pozîtîfî tesîrê komelî kenê. Perwerdekerdişê camêrdî hetê cinîyan ra lez ame qebulkerdene. ''

Gulîstane dîyar kerd ke projeyê înan bi nê hawayî do dewam bikerê û nika ra dewreyê înan ê perwerdeyî yenê kerdene.