Artêşa Tirkan a îşxalkere û leşkeranê rûsan ewro Marîs Mîle ra ver bi rojhelatê Kobane dest pê dewrîyeya hempare kerd. Şarê Kobane yo ke konvoya tirkan ê îşxalkeran erdê xo de nêwazeno, konvoye eşte kerrayan ver. Dewrîyeya hempare roniştoxan ser o guleyî varnayî. Hêrişî de 4ê înan bi giranî 8 sivîlî birîndar bîyî. Leşkeranê tirkan wesayîtê Jin TV û Ronahî TVyî  zî hedef girewt. Hêrişî de muxabîra Jin TVyî Zozane Remedan Berkel zî birîndar bîye.

Roja 11ê teşrîna peyêne de zî heman dîmenî amebî dîyene. Dirbêsîye de şarî vera di konvoyanê leşkerî yê ke dewrîye gêrayêne, nêrazîbîyayîşê xo mojna û konvoyî eştibî kerrayan ver.  8ê teşrîna peyêne de zî Girkê Lege ya kantonê Qamişloyî û Dêrikî de şarî vera konvoya hempare ya tirkan û rûsan a ke dewrîye gêrayêne nêrazîbîyayîşê xo mojna. Heman roje û çalakîye de hêzanê tirkan ciwanêk bi nameyê Serxwebûn Elî qetilkerdibi. Hêrişî de 5 sivîlî zî birîndar bibî.