Dewa Xirbet Emo ya Qamişlo de mabênê leşkeranê Amerîka yê ke  bi 8 wesayîtanê zirxinan dewrîye gêrayêne û leşkeranê rejîmê Sûrîye de pêkewtiş vejîya, yew tenî cuya xo vînî kerde.

Goreyê xebara ANHA konvoyê Amerîka nuqtaya kontrolê leşkerî yê rejîmî yê dewa Xirbet Emo de ameyî vindarnayene û mabênê înan de pêrodayîş vejîya. Dima ra dewijî zî tewrê ci bîyî pêrodayîş bi gird. Leşkerê Amerîka seba ke bieşkê ravêrê guleyî eştî hewa û wina 5 wesayîtê înan nuqtaya kontrolî ra ravêrtî la destûr hîrê wesayîtanê bînan nêdîya. Naye ser ra mabênê leşkeranê Amerîka û Sûrîye de pêkewtiş vejîya. Goreyê tayî îdîayan pêkewtiş de sivîlêk cuya xo vînî kerde û yew ten zî birînda bi.  Leşkeranê Sûrîye wesayîtanê Amerîka ser o guleyî varnayî. Leşkeranê Sûrîye hêrişê muxabîranê ANHA zî kerd, desta na kamaraya înan ser a û ê cayê serebutî ra fînayî dûrî.

Bi vejîyayîşê têmîyankewtişî teyarayê şerî yê Amerîka weriştî  û seba ke leşkerê înanê ke dewe de mexsûr mendî bieşkê vejîye serê dewe ra firdayîşo nizm kerd. Goreyê tayî ajansan teyarayanê Amerîka zî hêrişê cayanê leşkerî yê hêzanê rejîmî kerd. Derheqê nê îdîayan de heta nika eşkerayîyêke nêameye dayene.