Hemsereka Meclîsê Kantonê Kobanê Leyla Ehmed derheqê hêrişanê dewleta tirke de ANFyî rê qisey kerd û ard ziwan ke dewleta tirke wazena reyna Rojawanê Kurdîstanî îşxal bikera.

Leyla Ehmed îfade kerd dewleta tirke pê komployê hêrişê Taksîmî zemînê hêrişê vera Rojawanî awan kerdo û serrêke ra nata zî amadekarîya nê hêrişan kerdêne. 

Leyla Ehmed vat: ''Oyo ke dewleta tirke tira terseno modelê îdareyê xoserî yo ke bi felsefeya neteweya demokratîke ronîyayo. Dewleta tirke zanena ke no model do tesîrê komelê Tirkîya zî bikera. Coka seba ke hêrişê Îdareyê Xoserî bikera her roje senaryoyanê neweyan ber ana û bahaneyan afernana.''

Leyla Ehmed pare kerd ke hêzê mîyanneteweyî zî nê hêrişan ra mesuldar ê û vat: ''Şaranê Rojawnaî şerê vera DAÎŞî de bedelê pîlî dayî. Ma no erd bi gonîya domananê xo xelisna. Ma do qetî meverdê ke dewleta tirke erdê ma îşxal bikera. Ganî komelo mîyanneteweyî zî wezîfeyê xo yê exlaqî bikero.''