Ajansê fermîyî yê dewleta tirke AA vizêr bi serrnameyê ''MÎTî cinîyêka moldovayîje û 4 domanê ci destê YPG-PKKyî ra xelisnayî'' xeberêke weşanaye û îtîraf kerd ke MÎTî nê DAÎŞijî Kampa Holî ra remnayî.

Hêzanê Asayîşî yê Rojawanî wextêkê dergî ra nata pê hesîya ke MÎT wazeno merdiman Kampa Holî ra biremno û heta înan tay operasyonê MÎTî vindarnayî zî.

Çimeyêkî derheqê babete de ajansê ma rê wina qisey kerd: ''Ma pê hesîyayî ke MÎT xîret keno ke DAÎŞijan kampe ra biremno. Dima ma cigêrayîş kerd. Ma tay kesê ke bazirganîya merdiman kenê û cinîyê ke wazenê biremê tepiştî. Netîceya cigêrayîşî de ma musayî ke komêka MÎTî nê cinîyan pê rayîrê tay têkilîyan remneno û pê bedelê pereyan nînan roşeno keyeyanê ci. Tay cergê DAÎŞî Tirkîya de û şaristananê sey Bab, Cerablûs, Efrîn, Serêkanîyê û Girê Sipî de ke binê îşxalê dewleta tirke de yê manenê. Tirkîya cinîyan bena cayê mêrdeyanê ci yan zî Tirkîya. Bi nê hawayî cergan holêr dana şerkerdene.''

Hêzanê Asayîşê Zereyî tewr peyêne 16ê temmuze de 4 cinîyê ke Kampa Holî ra remayêne Tirkîya tepiştî.

Şerwananê QSDyî telefonê kesê bi nameyê Şahab Ehmed Abdulatîfî de ke sûrîyeyîj o, 23ê hezîrana 2018î de hûmata telefonî ya endamanê DAÎŞijan û lîsteya nameyê cinîyan dibi ke Tirkîya waştêne Kampa Holî ra biremna.

Şahab Ehmed Abdulatîfî îtîraf kerdbi ke ey Riha de MÎT şinasna û MÎTî seba remnayîşê cergan ci rê pere şawit. 

Kampa Holî de Iraq û Sûrîye zî tede 50 welatan ra 30 hezar endamê DAÎŞî estê û bi temamî 67 hezar kesî tede manenê.

Cinîyê DAÎŞî yê Kampa Holî bi nameyê El Hîsbe rêxistinêke awan kerde û cinîyanê bînan pê zorî kenê kole û cezaya şerîatî danê înan.

Rizmê vengdayîşê Îdareyê Xoserî zî welatêkî zî hemwelatîyê xo Kampa Holî ra nêgirewtî. Seba cinîyanê DAÎŞî mehkeme nêronîyaye û welatê nê cinîyan mesuldarîyêke nêgirewte xo ser.