Raportorê Tirkîya yê Komîteya Teqîbkerdişî yê Meclîsê Parlamenteran ê Konseya Ewropa Stefan Schennachî ajansê ma rê dîyalogê xo yê Tirkîya yê peyênî ercnayî.

Schennachî ard ziwan ke welat de prosesêkê haştîye çin o la vengdayîşê seba haştîye ganî bi hawayêkê cidîyî bêrê ercnayene.

Schennachî îfade kerd ke çarçewa zîyaretî de înan wezîran, selahîyetdaranê mehkeme û mehkuman de pêvînayîşî kerdî û prosesê haştîye pers kerd. Schennachî vat: ‘’Ma derheqê prosesê haştîye de qisey kerd û xeylê çîyî pers kerdî: No proses raşta zî yeno manaya çi? Efû çi yo? Mîyanê nê prosesî de kamyew vurnayîşê qanûnî est ê.’’

Raportorî pare kerd ke haştîye tena bi verdayîşê çekan nêbena û ganî nêzdîbîyayîşêkê paştdayîşî bêro mojnayene. Schennachî îfade kerd ke şert o ke babetanê perwerde, îdareyê umûmîye û beşdarîya komelkîye de vurîyayîşê bingeyînî bêrê kerdene û vat: ‘’Eke raşta zî şima qalê haştîyêke kenê, o çax ganî şima meseleya kurdan çarçewa dibistanan, sîstemê perwerdeyî û îdareyê umûmîye de biercnê. Tena bi çekverdayîşê PKKyî nêbeno; no tena haştîye nîyo.’’

Schennachî dîyar kerd ke mîsalanê Ewropa reyde înan prosesê haştîye yê Îrlanda seba Tirkîya sey modelêkê ercîyayeyî visto rojdem û vat: ‘’Ma Peymana Îrlanda sey mîsalî mojnaye; pê ci haştîyêka mende û raştikêne ameye kerdene. Hukmatê Brîtanya tepişteyî vera dayî û qanûnê sey Peymana Paskalya (Good Friday) kerdî.’’

Schennachî da zanayene ke babeta çareserîya demokratîke û haştîye de ê hinî destpêkê nîqaşanê Konseya Ewropa de yê û ard ziwan ke seba xorinbîyayîşê prosesî do menga teşrîna verêne de raporêkê hîrayî pêşkêş bikero.