Konfederasyonê Komelanê Demokratîkan ê Kurdîstanijan ê Almanya (KON-MED) 22yê hezîrane de Kongreya 4ine kerdibî. Hemserekanê KON-MEDî Rûkene Akça û Kerem Gokî ajansê ma rê Gokî proses, bir û armancê kongre ercnayî

Gokî da zanayene ke na kongre ê sey prosesêkî vînenê û vat: ‘’Ma hîrê-çar kombîyayîşê hîrayî kerdî. Nînan ra ber komîteya amadekarîye kombîyayîşê xo kerddî. Kongreya ma zî di rojan bi hawayêkê tarîxî derbaz bîye.’’

Rûkene îfade kerd ke KON-MED Almanya de hêzê rêxistinîye yê kurdan o û vat: ‘’Almanya de qasê 2 mîlyon kurdî est ê û temsîlkarê înan KON-MED o. Coka seba wayîrvejîyayîşê komelî yê kongre, seba serwerîya rojdemê kongre karêko komelkî ame kerdene. Kongre bi şîarê ‘Ma do bi îradeyê cinîyan, ciwanan û şarî modernîteya demokratîke û yewîya neteweyîye awan bikerê’ ameye kerdene.’’

Gokî pare kerd ke kongre de 34 birî ameyê girewtene û vat: ‘’Reya verêne ma mîyanê KON-MEDî de hetêko huqûqî awan kerd. Ma seba heqanê kurdan bipawê têkoşîn kenê. Şima zanenê ke vengdayîşê Rayber Apoyî reyde Tirkîya de prosesêko pozîtîf est o. La Hemserekê KCDK-E yo verên Yuksel Koç Almanya de tepişîya. Almanya hem prosesê haştîye pozîtîf vînena la hetê bînî ra krîmanîlîzekerdişî rê dewam kena. Kongre ma seba xurtkerdişê karanê kultur û hunerî, averberdişê ziwanê dayîke û perwerdeyî birî girewtî.’’

Rûkene ard ziwan ke paradîgmaya Rayber Apoyî reyde ê do komelî rêxistin bikerê û meclîs û komunanê xo newe ra rêxistin bikerê. Rûkene vat: ‘’Ma venga pêro partîyan, dezgeh û platformanê kurdan ê Almanya danê ke seba yewîya neteweyîye binê heman sîwanî de bêrê yewca. Ma têkoşînê xo yew bikerê.’’