Dima ke adara 2018î de dewleta tirke Efrîn îşxal kerd şarê Efrînî koçê Şehba kerd û kampan de ca bi. Dewleta tirke ya îşxalkere narey zî hêrişê Şehba kerd. Şarê Şehba û Efrînî binê bombardumananê dewleta tirke de xoverdayîşê xo rê dewam kenê û qerardar ê ke peynî de abigêrê erdê xo yê azadî.

Koçberanê Efrînî û şarê Şehba derheqê babete de ANFyî rê qisey kerd.

Hemsereka Meclîsê Til Rifetî Leyla Hisên Bekira ke şarê Efrînî ra ya, ard ziwan ke destpêkî ra nata dewleta tirke ya îşxalkere herême ser o hêrişê xo kêm nêkerdê û vat: ''Tewr zaf domanî benê qurbanê hêrişanê Tirkîya. Ma hînî sey şarê Efrînî venga kesî nêkenê, ma do bi xo asta têkoşîn û xoverdayîşê xo berz bikerê, Efrînî û pêro herêmanê îşxalkerdeyan bixelisnê. Ma do nê esasê projeyê neteweya demokratîke de pawitişê xo xurtêr bikerê û apey gamêke nêerzê.''

Roniştoxanê Til Rifetî ra Endama Meclîsê Til Rifetî Ayşe Mihemed da zanayene ke hukmatê Şamî û hêzê Rûsya seba pawitişê herême rolê xo nêanê ca û vat: ''Ma hînî pê çewî bawer nêkenê. Ma do bi xo herêmanê xo bipawê. Ez venga şarê ma dana ke vera dewleta tirke sereyê xo wedarno.''

Tewr peyên dayîke Elîfe Omara ke şarê Efrînî ra ya vat: ''Eke ma asta şorişgêrîya xo xurt nêkerê do bin bikewê. Dişmen her roje şarê ma keno hedef û wazeno ma qir bikero. Senî ke ma ameyê Efrînî ma do abigêrê Efrînî.''