Dewleta Tirkî ya îşxalkare dima ke dewa Mişrefa ra kewte rayîrê Hesekî ser ê başûrê Serêkanîyê û dewa Til Xenzîr û dewa Ezîzîye reyde merkezê şaristan zî tede tewr tay 7 reyan hêrişê herême kerd.

Hêrişê serê Mişrafe de hemwelatijêkê nameyê ci nêno zanayene şehîd bîyo, dewa Ebû Dîyabî de zî di sivîlî nameyê înan nênê zanayene birîndar bîyî. Hêrişê Ezîzîye de dibistana dewe bîya hedef. Tedbîran ra dibistane amebi vengkerdene û bi nê hewayî verê qirkerişêkî ame girewtene. Dewa Til Xenzîrî bîya hedef ke tede Ereb ciwîyayenê. Merkezê şaristanî de zî cayê ciwîyayîşê ke sivîlî tede bîyî, ameyî bombardûmankerdene.

Dimayê hêrişanê şervanan Meclîsê Leşkerî yê Serêkanîyê û şar pîya kewtê çeperan. Bi hezaran kesan dest eştî çekan û verê xo da verê Meclîsê Leşkerî û parbe kerd ke seba pawitişê erdê xo amade yê. Îmaîl Kalêyî dest eşt çek û vat: "Ma seba ke erdê xo bipawê ma çekî kerdî ra. Serêkanîyê erdê ma ya, seba pawitişê ci çi beno wa bibo ma ama de yê. Na roje roja rûmetî ya. No ca erdê ma yo wa Erdogan zî bizano." Xoverdayoxan ra Salîh Temoyî zî wina vat: "Çi beno wa bibo ma amade yê ke şaristananê xo bipawê. Merg zî do sere û çiman ser bibo. Ma serra 2013 de fek vera nêda û nika zî nêdanê." Kurdê Serêkanîye cinîya xo reyde çekî kerdî ra û vatêne: "Heta mergî ma Serêkanîye de yê. Ez û domanê xo ma xo ver danê. Ma honîya xo serê nê erdî de rişnaye. Ma do aye nêteriknê."