Dimayo ke dewleta Tirkî ya îşxalkare vizêr şan bi teyarayanê şerî dest pê hêrişê îşxalkerdişî yê Vakur û Rojakewtena Sûrîye kerd, Hêzanê Sûrîyeya Demokratîke (QSD) Minbicî ra heta Dêrikî wareyê sînorî de cewap danê îşxalkaran. Fermandarîya Pêroyî ya QSD'yî çend rojan verê cû bi eşkerayîyêke parbe kerd ke verba hêrişêko muhtemel ê dewleta Tirkî yê verba herême, do pêroyê sînorî de cewab bidê.

Fermandaranê Cepheyê Serêkanîye yê QSD'yî ra Baz Kerkûkî derheqê hêrişê îşxalkarîye yê dewleta Tirkî û xoverdayîşê QSD'yî de ANF'yî rê qisey kerd û vat, Îdareyê Xoserî yê Vakur û Rojakewtena Sûrîye seba ke şer nêqewimîyo zaf xîret kerd labelê dewleta Tirkî na sey ecîzîye dîye.

Kerkûkî ard ziwan ke wezîfeyê înan pawitişê şorişî yo û va: " Seba ke şer nêqewimîyo ma zaf xîret kerd, labelê înan seba şerî zaf israr kerd, ma zî bi wezîfeyê pawitişê şarê xo tê gêrenê. Verba îşxalkarîyanê ke wazenê welatê ma îşxal bikê û şarê ma esîr bigêrê, ma heta nika bi xoverdayîşê xo derbeyêka girane daye îşxalkaran ro. Hêzê ma sînorê Minbicî ra heta Dêrikî xo ver danê û cewabê dişmanî danê. Hêzê ma bi moralêko berz xo ver danê. Şervanê ma seke govend gênê xo ver danê. Wazenê îradeyê ma bişiknê. Labelê ma do firsend nêdê ke bikê. Ê hetê teknîkî ra verî de yê, ma zî bi îrade û heqdarîya xo xo verdanê. Ganî ma pêro firsendê xo rê, destkewteyanê xo rê wayîr bivejîyê. Wezîfeya tewr pîl ê welatperestîye no yo. No wezîfeyê ma pêroyînan o. Wa şarê ma yê Kurd, Ereb, Suryanî û pêroyê şarê ma bizanê ke heta çilka peyêne ya gonîya xo ma do destkewteyanê xo bipawê. Ma sozê xoyo ke seba pawitişê şarê xo dabi şarê xo, anê ca"