Îşxalkarîya Tirkî ya 16’ê Adar a 2018’î ra dima bi se hezaran Efrînijî nêçareyîye ra erdê Efrînî ca verda û koçê herêma Şehba û Şêrawa kerd. Dewleta Tirkî û xayînanê înan umîd kerdêne ke şarê Efrînî yewbînan ra bivisîyo û vila bibo. La no waştişê înan bica nêame. 

 Rixmê şertanê zoran ê koçî de şarê Efrînî organîzebîyayîşê xo pawit û hetêk ra xoverdayîşê xo domna, hetêna ra seba xo îmkanan aferneno. Şarê Efrînî Şehba de cuya xo bi hawayêkê komunalî domneno. Mamosteyê Efrînî rixmê heme îmkananê zoran de zî seba domanê Efrînî bêperwerde memanê, xebatanê xo yê perwerdeyî domnenê.

 Perwerdeyan Kuçeyan de Dest Pêkerd

Mamosteyê ke binê banê organîzasyonê sereke yê demokratîkî yê KPC’yî de organîze bîyê, koçê ewilênî ra heta nika domanê Efrînijî bê perwerde nêverdayê. Serra verêne ya perwerdeyî de xeymeyan de perwerde dest pêkerd. Serra dîyine de zî beşêk xeymeyan de û beşêk zî mektebanê ke şerî ver ra bîbî veng de dewam kerd. Dimayo ke mektebî kewtî betlane mamosteyanê Efrînijan xo veng nêverda û na rey xo perwerde kenê.

'Kemasîyanê Xo yê Branşî, Îdeolojîkî û Ziwanî Temam Kenê‘

Mamosteyê KPC’yî Akademîya Ş. Polat Efrînî, Dewreya Verêne Ş. Mamoste Egîdî de perwerde vînenê. Zahîde Mehmeya ke îdareyê dewreya perwerdeyî de ca gêna ANF’yî rê qisey kerd. 

Mehme wina vat: ''No dewre do mengêk dewam bikero. Sere de amacê mamosteyan o yo ke bi nê perwerdeyî kemasîyanê branşê xo û problemanê şexsîyan çareser bikerê. Mamosteyî bi nê hawayî hetê xo yê îdeolojîkî hîna xurt kenê û kemasîyanê xo yê Kurdkî û gramerê ci temam kenê.”