Wezîrê Karanê Teberî yê Tirkîya Hakan Fîdanî îdîa kerdbî ke çalakîkerê fedayîyî Rojawanê Kurdîstanî ra ameyê Anqara. Fermandarê Pêroyî yê QSDyî Mazlûm Ebdîyî hesabê xo yê medyaya dîjîtale de cewab da îdîayanê Fîdanî.

Mazlûm Ebdîyî vat: 

''Înanê ke hêrişê Anqara kerd, ê herêma ma ra nêşîyê. Ma terefê pêkewtişanê zereyî yê Tirkîya nîyê û pêkewtişan teşwîq nêkenê. Tirkîya seba hêrişanê neweyan ê vera herêma ma gêrena bahaneyan û no zî qesawetê ma zêdîneno. Hedefkerdişê binawanî û çimeyanê ekonomîkan ê herême sûcê şerî yo û ma no verê cû dîbî. Coka ma venga garantoran û komelê mîyanneteweyî danê ke vera nê tehlukeyan tewir bimojnê, aramî û haştîya herême bîyarê ca.''