Rojawano ke 11 hezar û 804 şehîdî dayî, tede Meclîsê Keyeyanê Şehîdan bi 8 komîte û 199 komunan xo resneno pêro keyeyan û karê rêxistinîye, paştdayîş, weşîye û ekonomîk keno. Rojawan de tewr tay 3 hezar û 893 cinîyê şehîdan, 11 hezar û 585 domanê şehîdan est ê.

Meclîsê Keyeyanê Şehîdan tewr ver 2008 de Şehba de xo rêxistin kerd û 2015 de nameyê xo yo ewroyîn girewt.

Meclîsê Cinîyan ê Keyeyanê Şehîdan bi dadîyanê şehîdan, cinîyan û domananê şehîdan de raşta raşye eleqedar beno. 25ê tebaxa 2023yî de Meclîsê Cinîyan konferansê xo yo diyîn kerd û bire daye ke xebatanê xo xurtêr bikero.

Hemserekê Meclîsê Keyeyanê Şehîdan ê Herêma Cizîre Hesen Ubeydî bale ante wezîfe û mesuldarîyanê înan ser û vat: ''Her roje ma şehîdan danê. Meclîsê Keyeyanê Şehîdan seba ke paştî bidê keyeyanê şehîdan, cinîyan û domananê şehîdan tim amade yo. Armancê ma yo esas verarkerdişê keyeyanê şehîdan o. Gonîya kurd, ereb, armenî, sûryanî, tirkmen, alman, fransiz û xeylêk neteweyan Rojawan de têbîye. Rojawan wayîrê 60 şehîdanê enternasyonelan o. Keyeyê 9ê înan ameyî herêma ma û wayîrê têkoşînê ewladanê xo vejîyayî.''

Berpirsîyara Meclîsê Cinîyan ê Keyeyanê Şehîdan ê Herêma Cizîre Hêvî Seyîd dîyar kerd ke ê seba ke paştî bidê dadî, cinî û domananê şehîdan karê perwerdeyî danê û xîret kenê ke meseleyan çareser bikerê.

Hêvî Seyîd bale ante akademîyanê seba cinî û domananê şehîdan ser û vat: ''Ma wazenê Dibistana Teknolojî ya Şehîd Beşîr Qamişloyî pêro şaristanan de ronê. Seba ney amadekarîyê ma dewam kenê. Ma perwerdeyê bi kurdkî, îngilîzkî, erebkî danê. Ma bi dibistanan xîret kenê ke domanî perwerdeyêkê holî bigêrê. Cinîyê şehîdan zî tewrê akademîyanê îdeolojîk û ê bînan benê. Ma kenê ke hîsanê nê cinîyan fam bikerê û paştî bidê înan. Wexto ke ma keyeyan zîyaret kenê, nînan ra hêz gênê. Ma zî keyeyê şehîdan ê. Coka ma yewbînan ra hêz gênê.''