DAÎŞ 3ê tebaxa 2014î de hêrişê Şingalî kerd û şarê êzidîyan qir kerd. Şaîr Ferhat Merde zî şahîdê dejanê şarê êzidîyan bi.

Ferhat Mendeyo ke wextê Fermanî de Dirbêsîyê de bi û Fermanî ser o cade têgêra derheqê babete de ANFyî rê qisey kerd.

Ferhat Mendeyî vat: ''Mi pê çimanê xo dî ke şar dejê senînî anceno. Hetêkî ra domanî hetêkê bînî ra zî dadîyî qîrayêne. Ma nêzanayêne ke senî hetkarîya înan bikerê. Şarê Rojawanî heta ke destê înan ra ameyêne hetkarîye kerdêne. La no zî nêvejîyayêne. Çunke bi hezaran merdimî ameybî Rojawanî. Halê pêroyînan pêrîşon bibi. Nê merdimî lingwarve ameyî Rimêlan û uca ra derbazê Kampî bîyî.''

Merdeyî pare kerd ke ey Fermanê Şingalî ser o şîîrêke zî nuşta û vat: ''Ma êzidîyan rê na şîîre wende, ma pîya bermayî. Ez nêeşkaya dejanê êzidîyan vaja coka mi na şîîre nuşte. Cerganê êzidîyan waşt ke şarê mi qir bikerê, bawerî û kulturê ma çin bikerê. Têgêrayîşê Azadîye û 12 siwarîyanê înan vera DAÎŞî êzidîyî pawitî. Înan seba êzidîyî xo ver da, kede daye, şehîd bîyî. Her kes zaneno ke kamî seba êzidîyan xo ver da. Şexsê Egîd Civîyan û Mam Zekîyî de bi hezaran şingalijî ameyî azadkerdene. Tayî wayîrê Şingalî vejîyayî. Ê bînan zî Şingal ver da û remayî.

Ganî Qirkerdişê Şingalî nêro vîrakerdene û hunermendî pê eseranê xo qala nê qirkerdişî bikerê. Şarê êzidîyan hema zî vera dewleta tirke, hukmatê Iraqî û PDKyî xo ver danê. Ma do fermanan xo vîr a mekerê. Ganî hunermendî wayîrê şarê êzidîyan vejîyê û mesuldaranê nê qirkerdişî teşhîr bikerê.''