Hetêk ra teşebusê dewleta Tirkî yê binê nameyê ‘herêmanê asayîşî’ de ke wazena Rojawan-Vakur û Rojakewtena Sûrîye îşxal bikero û hetêna ra çalakîyê mertalanê ganeyan ê şaranê Vakur-Rojakewtena Sûrîye dewam kenê.

Girê Sipîyo ke dewleta Tirkî hemverê ci de leşker û çekê xo ardê pêser, şarê herêma bi rojan o xeymeyî ronayê û çalakîya mertalanê ganeyan kenê. Girê Sipîyo ke 15’ê Hezîran a 2015’î ra nata hetê şerwananê YPG û YPJ’yî ra ameyo xelaskerdene, şarê Ereb, Kurd, Ermen û Tirkmenî bi îdareyê hemparî bi hawayêkê demokratîkî bajarê xo rayra benê. Hetkarê hemserekanê Îdareyê Xoserî yê Kantonê Girê Sipî Sebrî Mistefayî gefê îşxalî yê dewleta Tirkî ANF’yî rê ercnayî û vat do îşxalî bi tu hawayî qebul nêkerê.

‘Sebebê Krîzê Sûrîye Dewleta Tirkî ya’

Mistefayî bale ante serê karakterê îşxalî û kolonyalî yê dewleta Tirkî û vat  ke roja ke şerê Sûrîye dest pêkerdo ra nata sebebo tewr pîl o ke Sûrîye kewto nê halî dewleta Tirkî ya. Mistefayî vat, “Roja ke krîzê Sûrîye dest pêkerdo ra nata bi rolêkê negatîfî têgêrena û bi her hawayî destek dana çeteyan. Gama ke DAÎŞ tîya bi sînorê înan heta peynî DAÎŞ’î rê akerde bi û bi her hawayî tîcaretê çekan, cebilxaneyan û şîyayîş û ameyîşê çeteyanê DAÎŞ’î ameyêne kerdene.”

Nimûneyê Efrînî Verê Çiman de yo

Mistefayî ard ziwan dimayo ke bajar DAÎŞ‘î ra ame pakkerdene înan sîstemêko demokratîk o ke xo seperneno biratîya şaran herême de awan kerdo û vat, dewleta Tirkî na yewe sey gefêk hemverê xo vînena. Mistefayî vat, “Dewleta Tirkî senî ke Cerablûs, Bab, Ezaz, Efrîn û Idlîb îşxal kerdî, wazena na herême zî îşxal bikero û demografîya ci bivurno. Nimûneyê Efrînî vernîya çiman de yo. Dinya vînena ke Efrîn de se kenê.”

 ‘Dewleta Tirkî Çareserîya Krîzê Xo Şer de Vînena’

Mistefayî pêhesna ke dewleta Tirkî Heleb ra heta Şengal, Kerkûk û Mosilî herême sey erdê xo vînena, wazena herême îşxal bikero û vat amacêko bîn ê gefanê îşxalî no yo ke Tirkîya de krîzêk esto. Mistefayî vat, “dewleta Tirkî zere û teber de xeylî teng bîya. Hetê ekonomî, sîyasî û polîtîkaya teberî ra dewleta Tirkî tenge de menda. Çareserîya nê zî şer û îşxalî de vînena.”

 Bêvengîya Hemverê Gefan

Mistefayî da zanayene ke şarê herême gefanê ke yenê wendene cidî vînenê, nêwazenê huzûro ke dimayê pakkerdişê DAÎŞ’î herême ra fînîyayo dest vînî bikerê. Mistefayî vat koalîsyono mîyanneteweyî yo hemverê DAÎŞ’î ganî tewirê xo eşkera bikero û hemverê gefanê Tirkîya de bêveng memano. Mistefayî ard ziwan ke hêrişê Tirkîya beno ke DAÎŞ’î newe ra biaferno.

‘Bazar Serê Ma de Mekerê’

Mistefayî vat ke dewletê pîlî ganî serê înan de hesaban nêkerê û vat, “Ma pîya bi koalîsyonê hemverê DAÎŞ’î hemverê DAÎŞ’î de mucadele kerd û hetê leşkerî ra DAÎŞ bin fîna. Labelê dewleta Tirkî nika gefan wanena. Hêzê mîyanneteweyîyî vernîya nay ewe de bêveng ê. Her dewlete goreyê menfaatanê xo têgêrena, labelê ma seba her kesî mucadele kerd. Na yewe ra ma înan ra umîd kenê ke tewirê xo eşkera bikerê, wezîfeyê xo yê exlaqî û wijdanî bica bîyarê.”

 Qerardarîya Seba Xoverdayîşî

Mistefayî ard ziwan ke şar do destkewteyan û erdê xo bipawo û vat, “Ma, şarê Girê Sipî şerêkê muhtemelî de ma do xo û erdê xo bipawê. Seba nê zî ma çewî ra destûr nêwazenê. No yew vatişê ma yo peyên o.”