Partîya Azadîye ya Mezopotamya (MOP) beyanatêko nuştekî weşana û komkîştişê kolanê El Wehdeyî yê Qamişloyî şermezar kerd. Galê vizerî de yo ke bi wesayîta bombabarkerdeye  ame kerdene, 6 sîvîlan cuya xo vîndî kerde û 40 sîvîlî zî birîndar bîy.

'Seba terorî herêma biemnîyete’ 

Beyanatî de ame vatene: “ma komkîştişê gonîwerî yo ke vera şaranê asûrî-suryanîyan, keldanî, armenî û kurdan ame kerdene huşka şermezar kenê û kesanê ke cuya xo vîndî kerda bi rêzdarî anê xo vîrî û birîndaran rê weşîye wazenê.”

MOPî nîşan kerd ke dewleta qirker a tirkan derfetê “herêma biemnîyete” pêşkêşê DAÎŞ, El Nusra û cerganê sey înan kerd û dîyar kerd ke na yewe seba terorî herêma biemnîyete la seba şaran herêma bitehlukeye ana meydan. 

Beyanatî de vajîya: “Seba ke vera Dewleta Tirkan helwestêko cîdî nêno musnayene, galê şaran, erd û nirxanê ma kena û merdimanê ma kişena. Armancê Dewleta Tirkan bi destê cîhadîstanê xo vurenayîşê demografîyê Vakur û Rojhelate Sûrîye yo û wereardişê stratejîyê Mîsaki Millî yo.”

'Ma erdê xo cameverde’

MOPî venga hêzanê mîyanneteweyî da ke vernîya Dewleta Tirkan de bibê asteng û vat: “Ma venga pêro şaranê xo danê; erdê xo cameverdê. Şarê ma yê dîyaspora ganî vera na hişmendîya qirkere, îşxalkere ya Dewleta Tirkan her ca de nerazîbîyayîşîê xo nîşan biderê.”