Fermandaranê QSDyî ra Mordem Kobanêyo ke xoverdayîşê Awbendê Tişrînî de cagêno ajansê ma rê qalê xoverdayîşî kerd. 

Mordem Kobanêyî pare kerd ke dima ke rejîmê Esadî rijîya herême de vurîyayîşî dest pêkerd û vat: ''Ma goreyê gefan xo amade kerdibi. Ma cade sey hêzanê QSD û YPJyî derbazê herêma Dêr Hafirî bîyî.

Dewleta tirke û çeteyanê ci vera Minbic, Awbendê Tişrîn û Pirdê Qereqozaxî dest pêkerdişan kerd. Ma hetêkî ra mewzîyê xo xurt kerdî û hetê bînî ra cewabê hêrişanê îşxalî da. Pêkewtişê giranî qewimîyayî. Embazanê ma bi fedayîtî şer kerd û averşîyayîşê îşxalkeran asteng kerd. Roja verêne ra nata ma vat ke rayîr nêdê îşxalkeran û bi na qerardarî têgêrayî.''

Fermandar Mordem Kobanê wextê operasyonê xelisnayîşî de  herêmanê çeteyan de sey fermandarê cephe erk kerd. O çax şerwanan dewa Kişlî ra heta Girê Syriatelî hêrişê çeteyan şiknayî. 

10ê çeleyê 2025î de çeteyanê dewleta tirke vera  mewzîyanê QSD û YPJyî hêrişî dayî destpêkerdene la şerwanan nê hêrişî şiknayî. Ê prosesî de Fermandar Mordem Kobanêyî wina xîtabê şerwanan kerdibi: ''Nê xoverdayîşî qederê şarê ma vurna. Ma naye ra pey serkewtişêkê pîlî bivisnê destî. Berxwedan Jiyan e..." 

Xoverdayîşê şerwanan vera hêrişan Tişrîn de bi xurtî dewam kenê. Şerwanî her ke hêrişanê çeteyanê îşxalkeran şiknenê sloganê ''Berxwedan Jiyan e'' û ''Jin, Jiyan, Azadî'' vanê.