Forûmo mîyanneteweyî yê hemverê DAÎŞ’î yo ke salona Belesan a qezaya Amûdê ya Qamişloyî de hetê Merkezê Rojawanî yê Cigêrayîşanê Stratejîkan (NRLS) ra ame organîzekerdene, roja hîrêyine de bi eşkerakerdişê encamnameyî qedîya. Forûmo ke rojnamekar, akademîsyen, sîyasetmedar, cigêrayox, temsîlkarê dînî yê ke cayanê cîyayan ê dinya ra ameyê tewrê ci bîyî, ê de terorê DAÎŞ’î, hetê leşkerî, ekonomî, kulturkî, dînî, cinî û cimatkîyî ameyî ercnayene û heman wextî de welatê ke paştî danê ci zî ameyî ercnayene.

 Encamname hetê îdarekara Merkezê Rojawanî yê Cigêrayîşanê Stratejîkan (NRLS) Leyla Resûle ra ame wendene.

 Çend madeyê muhîmî yê eşkerayîye wina yê:

 -Seba binfînayîşê DAÎŞ’î hetê koalîsyonî û cimatê mîyandewletîyî ra stratejîyêka hempare ya asayîşî, fikrî, kulturkî, ekonomî û cimatî bêro bewlîkerdene.

 - Yewîya Pawitişê Şarî, Yewîyanê Pawitişê Cinî û Hêzê Sûrîyeya Demokratîke seba terorê DAÎŞ’î ra pawitişê herême û dinya kedêka pîle daye. Rixmê nê de zî se ra 30’ê cayîyê Sûrîye dîyalogê çareserîye ra yenê dûrvistene, netîce de nê tesîrêko xirab sere dewaya asayîşî û sîyasetî de kerde. Naye ra ganî hetê mîyanneteweyîyî û dewletê aktîfî, îdareyê sîyasî yê Vakur û Rojakewtena Sûrîye dir dest bi prosesê dîyalogan bikerê.

 - Qerarê Konseya Asayîşî yê ke çinêkerdişê DAÎŞ’î dir eleqedar ê bêrê bicaardene. Seba bicaardişê edaletî ganî mehkemayêka mîyandewletîye Vakur û Rojakewtena Sûrîye de bêro ronayene. 

 - Hetê DAÎŞ’î ra serê cimatê Kurdî yê Êzidîyan de û cinîyan ê Êzidîyan ê Şengalî de qirkerdişî ameyî kerdene, ganî Neteweyê Yewbîyayeyî na rastî qebûl bikero, heqanê Kurdan ê Êzidîyan bipawo, hurmet ramojno û heman wextî de cimato Êzidî yo kan qirkerdişanê neweyan ra bêro pawitene.

- Efrîn de kerdişê vurnayîşê demografîkî û qirkerdişê etnîkîyî yê ke hetê grûbanê cîhadîstan ra yenê kerdene paştî dewleta Tirkî ra gênê, no zî dewamê kerdişanê organîzasyonanê DAÎŞ û Cebhet el-Nûsra yo. Na yewe ra mucadeleyê hemverê nê organîzasyonan seba pawitişê herême û temamê dinya çîyêko muhîm o.

- Roja 23’ê Adare sey roja çinêkerdişê DAÎŞ’î ya dinya bêro îlankerdene.”