Hemserekê TEV-DEMî yê Kantonê Firatî Enwer Muslimî derheqê biranê Dewaya Dafike ya Kobanê de ANFyî rê qisey kerd.

Muslimî îfade kerd ke Kobanê de yewîya şaran amebî caardene û bi nê hawayî DAÎŞ amebi binvistene. Muslimî vat: ''Îqtîdarê AKP-MHPyî binê nameyê Dewaya Kobanê de waşt îradeyê şaran bişikno û la tradîsyonê xoverdayîşî hema zî dewam keno. Şarê kurdî qetî sereyê xo nêard war û do nêaro. Dewaya Kobanê de çareserîya meseleya kurdan zî ameyêne muhakemekerdene. Dewaya Kobanê teyna meseleya kurdan nîya meseleya merdimatîye ya. Çunke  Kobanê de rûmetê merdimatîye ame pawitene û na dewa de êyê ke destekê xoverdayîşê Kobanê bîyî yenê muhakemekerdene.

O çax Koalîsyono Mîyanneteweyî ronîya û Koalîsyonî bi destekê tay kesan xoverdayîşê Kobanê de cagirewt. La nika Koalîsyon vera tepişîyayîşê nê kesan û Dewaya Kobanê bêveng o. Dewaya Kobanê dewayêka huqûqî ney sîyasî ya. Ganî dezgeh û rêxistinê heqanê merdiman vera na dewa tewirê xo bimojnê. ''

Enwer Muslimî dîyar kerd ke rejîmê zulmî demokrasîyî sey tehlukeyî vîneno û vat: ''Ewro eke hema zî dewleta tirke hêrişê herêma ma kena, sebebê ney tersê ci yo. Dewleta tirke têdûştî û azadîya şaran û demokrasîyî ra tersena. Tirkîya ê kesanê ke hêz dayo xoverdayîşê Kobanê tepişena, hêrişê warê xoverdayîşî kena. Her gamêka ke dewleta tirke erzena yê verênan ra xirabêr a, polîtîkaya qirkerdişî ya.''