Hemserekê Partîya Yewîya Demokratîke (PYD) Salih Muslimî derheqê hêrişanê dewleta tirke yê vera Rojawanî de yê ke her tim zêdîyene, ajansê ma rê qisey kerd.

Muslimî ard ziwan ke badê weçînitişî hukmatê şerî ame ronayene û planê çokdayîşî dîya domnayene û vat, “Xora ma verê weçînitişî zî vatbi ke dîktatorî bi rayîrê edîlî nînê wardayene. Çi heyf ke vervînayîşê ma raşt vejîya. No faşizm bi heme xîleyanê xo payra mend û planê çokdayîşî domneno. Rojawanê sereyê nê planî de yo. Badê ronayîşê hukmatê şerî hêrişî cade dîyayî destpêkerdene. Weçînitişî ra hema hêrişî nêvîndertî. Heme metodanê bêehleqan şuxulnenê, cinî, doman nêvanê hêriş kenê. Bitaybetî wazenê Îdareyê Xoserî û kurdan çîn bikerê. Planê xo fînayî dewre. Ma xora zanayêne do wina bibo. Ma do sey şarî vera nê xover bidê.” 

Muslimî wina dewam kerd: “Dewleta tirke wazena verê kombîyayîşê Astana hêzê xo ramojno. Esas waştişê ci oyo ke zirar bido Îdareyê Xoserî. 21 de kombîyayîşê Astana est o, ma nêzanê senî qerar genê la hetêkî ra bîyî bêveng. Beno ke warê hewayî têna semedê droneyan nê semedê teyarayanê şerî ameyo akerdene. Dewleta tirke vana mi rê warê hewayî akerdo û rehet hêriş kena. Xora Rûsya zî nika rîyê şerê Ukrayna ra muhtacê Tirkîya ya. Mabênê înan de xeylêk pêkerdişî est ê. Coka vengê xo nêvena. Rejîmê Sûrîya zî xora goştarîye Rûsya û Îranî keno. Vera hêrişanê dewleta tirke yê vera herême çew vengê xo nêvejeno.9 leşkerê rejîmê Sûrîye merdî veng çîn o.Sûrîye mesajê tezîye zî nêda. 

Seke yeno zanayene Îdareyê Xoserî semedê çareserkerdişê problemanê Sûrîye deklarasyon weşana. Tirkîya ne semedê Sûrîye çareserî wazena ne zî wazena kurdî mîyanê ci bê. O bînî zî Îdareyê Xoserî da pêhesnayene ke do çeteyanê DAÎŞî muhakeme bikero. Ey zî nêwazena. Çunke karê ci yê leyminê ke pîya bi çeteyan kerdî vejîyenê meydan. Coka hêrişê xo zêdînayî. Goreyê tay vatişan mabênê Rûsya, Sûrîye û Tirkîya de pêkerdiş ameyo kerdene. Goreyê nê vatişan do tay cayê Idlibî rejîmî rê bimanê û rayîrê M4î yê mabênê Heleb û Lazkîye bêro akerdene. Beno pêkerdişo winayên bibo.  

Ma biewnê netîceyê kombîyayîşê Astana senî benê. Ma paştîya xo bi hêzanê teberî gire nêdanê. Paştîya ma şar û hêzanê ma ra pêt a. Se beno wa bibo ma do xover bidê, yewna çareyê ma çîn o. Beno ke drone û teknikê dewleta tirke çend tenan bikişo la nêeşkeno îradeyê şarê ma bişikino. Eke operasyonê erdî bikerê no do bibo rijnayîşê dewleta tirke. Hêzê ma hazir ê. Gerek hêzê demokratîkî paştî bidê ma. Ma vera dîktatoran semedê estbîyayîşê xo û pawitişê erjanê demokratîkan xover danê."