Hemserekê Partîya Yewîya Demokratîke (PYD) Salih Muslimî derheqê pêvînayîşanê Anqara-Şam-Tahran-Moskova, şertê ke Şamî teqdîmê Anqara kerdî, armancê înan û çareserîya esasî de ANFyî rê qisey kerd.

Salih Muslimî vat: “Rejîmê Sûrîye dişmenê kurdan o. Tirkîya dişmena stretejîk a kurdan a. Îran tim vera meseleya kurdan tewirê ci bewlî yo.  Rûsya wazena semedê menfeatê xo nê pêrune bîyaro têhet. Seba ke Sûrîye de kurdî çînêbê yenê têhet. Heme meseleya înan kurd ê. Kenê ke îdareyê ke tîya zaf xebatê erjîyayî kerdî, werte wedarê.  Eke Rûsya raşta wazena mesela çareser bikero, 2012yî  ra têkîlîya ma est a, heta nika eşkayêne rejîmî reyde mesele çareser bikero, la çi heyf ke nêkerd. Goreyê menfeatê xo têgêrena. Herinda çareserkerdişê mesele de dahîna gird kenê. Ma hêvî kenê ke na xeletî ra agêrenê. ”

Muslimî ard ziwan ke eslê xo de meseleyê mabênê Şam û Anqara zaf xorîn ê û vat: “Bi se hezaran kesan dinyaya xo bedilnaye û bi mîlyonan kesan bar kerd. Se ra hewtey Sûrîye rijîyaye. Sebebê nê pêrune Tirkîya ya. Efrînî ra heta Îdbîl, Girê Sipî xeylêk cayî îşxal kerdî. Heta El Kaîde xeylêk çeteyî ca kerdî û heta nika zî paştî dana înan. Nê heme çîyê ke yenê kerdene, vera kurdan û Îdareyê Xoserî komplo yo. Meseleya kurdan ser pê kerdo. Çîyanê bînan ser o senî pê kenê? Şam Tirkîya û çeteyî vera Îdareyê Xoserî hesabê ronayîşê hêzê hemparî kenê.”

Muslimî vist vîrî ke înan vera heme çeteyanê ke dewleta tirke paştî dana ci, şer kerdo,  cayê îşxalkerdeyî  xelisnayî û nê vatî: “ Çîyê ke kerdî nînê qebulkerdene. Vera nê hemîyan ma tedbîranê xo genê. Vanê qey eke kurdan werte ra wedarê Amerîka tîya ra vejîyena.  Amerîka semedê kurdan tîya de nîya. Semedê menfeatanê xo yê Rojhelatê Mîyanênî tîya de yê. Ma sey leteyêkê Sûrîye yewîye wazenê. Semedê ma çîyo muhîm oyo ke wa Sûrîye de demokrasi bibo. Wa şaranê xo rê hurmet bikero. Ma meseleyanê zereyî pîya çareser bikerê. Semedê ma bedilnayîş û demokratîkbîyayîşê rejîmî muhîm o.”