Binê nameyê ‘herêma biasayîşe’ de gefê dewleta Tirkî yê seba îşxalkerdişê Vakur û Rojakewtena Sûrîye dewam kenê. Heyetêkê DYA yo leşkerî do meşte şiro Tirkîya. Kombîyayîş de do plane çareserî yê Îdareyê Xoserî yê Vakur û Rojakewtena Sûrîye û plane îşxalî yê dewleta Tirkî bêrê ercnayene.

 Seba ercnayîşê ‘herêma biasayîşe’ 22’ê Temmuze de Temsîlkarê DYA yo Taybet ê Sûrîye James Jeffreyî pîya bi selahîyetdaranê Tirkî Enqere de pêvînayîş kerdibi û heman wextî de Fermandarê Hêzanê Merkezî yê DYA (CENTCOM) orgeneral Kenneth McKenzie zî Eyn Îsa de fermandarê pêroyî yê QSD’yî Mazlûm Ebdî û temsîlkaranê Îdareyê Xoserî dir pêvînayîş kerdibi.

 Seba asayîşê sînorî Îdareyê Xoserî yê Vakur û Rojakewtena Sûrîye pêşnîyar keno ke herêmêk ke xorîyîya ci 5 kîlometreyî ya û tede bajar çino bêro awankerdene. Dewleta Tirkî zî zextan kena ke ‘herêmêk ke xorîyîya ci 30 ra heta 35 kîlometreyan a’ bêro awankerdene. Dimayê pêvînayîşî ra selahîyetdaranê Tirkan îdîa kerd ke ‘pêşnîyaro ke ameyo kerdene seba înan mirdkerdox nêyo’ û gefê şerî wendîbî.

 Erdogan: Ma do Perçe Bikerê, Bahçelî: Ma do Xira Kerê

Serekkomaro Tirk Tayyîp Erdoganî gefê îşxalî kerdî û vat, “pêvînayîşê seba awankerdişê herêma biasayîşe ya sînorê Sûrîye yê DYA dir senî netîce danê wa bidê ma qerardar ê ke korîdorê terorî yê rojakewtena Firatî perçe kerê. Seba nê zî ma do çewî ra destûr nêwazê.” Hemkarê Erdoganî serekê MHP’yî yo pêroyî Devlet Bahçelîyî zî vat, “Ganî Vakurê Sûrîye bêro vêşanyene û hêzê Tirkan înan rê bêro ramotene.”

 Eşkerayîyê Jeffrey

Dimayê nê eşkerayîyan Jeffreyî şi serdana welatanê Ewropa yê ke koalîsyonê hemverê DAÎŞ’î de ca gênê û dimayo ke agêra Wahington vat ke babeta ‘herêma biasayîşe’ de înan Tirkîya dir pê nêkerdo. Jeffreyî vat, “Ma sozê xo dir pabeste yê ke ma vatibi, ganî êyê ke hetê ma de şer kenê zirar nêvînê û nêbê hedefê hêrişê çewî. Serekî zî na yewe bi eşkerayî vat. Qesawetê ma yê derheqê Tirkan de zî kewenê na çarçewa mîyan.”

Do Meşte Enqere de Pêvînayîşan Bikerê

Tûro dîyin ê ‚herêma biasayîşe‘ do meşte dest pê bikero. Yeno pawitene ke heyetêkê DYA yo leşkerî şiro Tirkîya û bi selahîyetdaranê Tirkan dir derheqê babete de qisey bikero. Hetê bînî ra têgêrayîşê dewleta Tirkî yo leşkerî yê hemverê Şexlêr, Kobanê, Girê Sipî û Serê Kanî serê sînorî de dewam keno. Îdareyo Xoser ê Vakur û Rojakewtena Sûrîye zî giranî dana serê xebatanê dîplomatîkan ê şaranê herême û hêzê leşkerîyî zî xo hemverê hêrişan de amade kenê.

Endamê Heyetê Îdarekarî yê Têgêrayîşê Cimatê Demokratîkî (TEV-DEM) Aldar Xelîlî ANF’yî rê derheqê babete de qisey kerd. Aldarî seba pêşnûmeyo ke nameyê ci ravêreno vat: „Ma her firsendî de vane ke ma şer nêwazenê, ma welatê xo de yê û zirarê ma nêresayo çewî û ma na çarçewa de têgêrenê. Pêşnîyarê ma zî o yo ke çîyo ke ci ra ‚herêma biasayîşe‘ yeno vatene bi xorîyîya 5 kîlometreyî bo û teberê bajaran de bo. Hêzê a herême zî ganî hêzê cayîyî bibê. Hêzê koalîsyonî eşkenê herême de dewre bigêrê. Tirkîya nê, la ganî binê kontrolê hêzanê mîyanneteweyîyan de bo.“

Şar Xo Seba Xoverdayîşî Amade Keno

Endamê Heyetê Îdareyî yê TEV-DEM’î Aldar Xelîlî vat ke rixmê pêvînayîş û dayîş-girewtişanê dîplomatîkan, eke hêrişêk hemverê înan de bêro kerdene, şarê herême bi serran o se keno do ê bikero, do xover bido û ê zî amadekarîya xo bi nê hawayî kenê.Xelîlî vat, “Ma ê hêz ê ke DAÎŞ bin fînayo. Wa kes nêvajo ke ma do bi asanî fek herême ra vera bidê.”